काठमाडौं – सिबर्डस् पिक्चर्स र होप्स बजले ट्राइडेन्ट कन्सेप्टसँग सहकार्य गरेर फिल्म ‘रातो पासपोर्ट’ बनाउने भएको छ । निर्माण पक्षले आइतबार यस फिल्म निर्माणको घोषणा गरेको हो ।

युरोपमा रहेका नेपालीहरुले त्यहाँको नागरिकता लिने गर्ने संघर्षको कथामा आधारित रहेर उक्त फिल्म बनाउन लागिएको निर्माण पक्षले जनाएको छ ।

पोर्चुगलको पासपोर्टको बाहिरी पृष्ठको थिममा निर्माण पक्षले टाइटल पोस्टर सार्वजनिक गरेको छ ।

यस फिल्मका कलाकार चयनको काम भने बाँकी रहेको छ । चाँडै यसमा काम हुने निर्माण पक्षले बताएको छ ।

युरोप र बेलायतमा रहेका कलाकारहरूलाई अडिसनमार्फत छनोट गरिने योजना निर्माण टोली रहेको कार्यकारी निर्माता प्रवेश पौडेलले बताए । फिल्मको छायाङ्कन पनि पोर्चुगलसहितका युरोपका देश र नेपालमा हुने बताइएको छ ।

फिल्मको कथा माइकल तामाङ र पटकथा तथा संवाद प्रदीपकुमार चौधरी रहेको बताइएको छ।

फिल्मको निर्देशक सिमसोन तामाङ र निर्माता लोकबहादुर तामाङ रहेका छन् ।

निर्देशक तामाङले यसअघि ‘धन्य माया जाल’, ‘लप्पन छप्पन २’ र ‘असुर द मिस्ट्री‘ (हिन्दी) जस्ता चलचित्रमा एक्सन निर्देशकरुपमा काम गरेका थिए ।