काठमाडौं – पाकिस्तानले भारतको जम्मू र पठानकोटमा ड्रोन आक्रमण गरेको छ । बिहीबार राति पाकिस्तानले जम्मु र पठानकोट वायुसेना स्टेसनलाई निशाना बनाएर ड्रोन आक्रमण गरेको भारतीय सञ्चारमाध्यमहरुले जनाएका छन् ।

यता भारतले पाकिस्तानी सेनाको एफ १६ लडाकु विमान खसालेको गरेको छ । भारतीय टेलिभिजन आज तकका अनुसार भारतले एस ४०० हवाई प्रतिरक्षा प्रणालको माध्यमले उक्त लडाकु विमान खसालेको हो । यसबारे पाकिस्तानी पक्षले कुनै टिप्पणी गरेको छैन ।

यस्तै जैसलमेर–पोकरणमा पाकिस्तानको आक्रमण असफल भएको भारतले दाबी गरेको छ । पाकिस्तानद्वारा आक्रमणका लागि पठाईएको ड्रोन खसालेको भारतीय सञ्चार माध्यमले जनाएका छन् ।

यस्तै श्रीगंगानगरमा रेड अलर्ट जारी गरिएको छ । मानिसहरलाई घरमै बस्न अपील गरिएको छ । सीमावर्ती जिल्लाहरुमा विद्युत आपूर्ति बन्द गरिएको बताइएको छ ।

भारतका जम्मु कश्मिर, गुजरात लगायतका सीमावर्ती जिल्लाहरूमा ब्ल्याकआउट गरिएको छ । सर्वसाधरणलाई सावधानी अपनाउन आग्रह गर्दै साइरन बजाइएको समाचारमा उल्लेख छ ।

२२ अप्रिलमा पहलगाममा भएको आतंकवादी हमलाको बदला लिन भन्दै भारतीय सेनाले पाकिस्तानका ९ स्थानमा मंगलबार राति आक्रमण गरेको थियो । त्यसपछि दुई देशबीच युद्ध चर्किन थालेको छ । बिहीबार आईपीएल खेलअघि बीसीसीआईले सम्मान समारोह आयोजना गरेको थियो। कार्यक्रममा प्रसिद्ध गायक बी प्राकले देशभक्तिपूर्ण गीत गाएर भारतीय सेनाको मनोबल बढाएका थिए ।