काठमाडौं– पाकिस्तानले भारतीय आक्रमणको जवाफ दिन चिनियाँ हतियारको प्रयोग गरेको जनाएको छ । एक जना नेपाली सुदिप न्यौपानेसहित २६ जनाको ज्यान जानेगरी भारत प्रशासित जम्मु कश्मीरमा भएको आतंककारी आक्रमणको जवाफस्वरुपा भारतले गरेको हवाइ आक्रमणको जवाफमा चिनियाँ हतियारको प्रयोग गरेको पाकिस्तानी विदेशमन्त्रीले जनाएका हुन् ।

अपरेसन सिन्दुर नामक कारवाहीका क्रममा भारतले पाकिस्तानी भूमिमा ९ स्थानलाई लक्षित गरी हवाइ आक्रमण गरेको छ । भारतीय आक्रमणको जवाफ दिन पाकिस्तानले चीनमा निर्मित जे–१० सी लडाकु विमानको प्रयोग गरेको पाकिस्तानी विदेशमन्त्री इशक दारले संसदलाई जानकारी दिएका हुन् ।

आक्रमणको जवाफस्वरुप पाकिस्तानले भारतका ५ लडाकु विमान खसालेको दाबी गरेको छ । यद्यपि भारतीय पक्षले पाकिस्तानी दाबीबारे कुनै आधिकारिक टिप्पणी गरेको छैन ।

उनका अनुसार यसबारे चीनलाई पाकिस्तानले पूर्वजानकारी दिएको थियो । भारतले पाकिस्तानी भूमिमा आक्रमण गरेको केही समयपछि स्थानीय समयअनुसार बुधबार सबेरै ४ बजे पाकिस्तानका लागि चिनियाँ राजदूत जियाङ जाइदोङले पाकिस्तानी विदेश विभाग कार्यालयको भ्रमण गरेको दारलाई उद्धृत गर्दै ब्लूमबर्गले उल्लेख गरेको छ ।