काठमाडौं- प्रधानमन्त्री केपी शर्मा ओलीले निरोगी नेपालको महाअभियानअन्तर्गत कुष्ठरोग निवारण प्रयत्नलाई अझ गतिशील र प्रभावकारी बनाउनुपर्ने बताएका छन् ।

स्वास्थ्य मन्त्रालय र विभिन्न संस्थाद्वारा बिहीबार काठमाडौंमा आयोजित नेपाल कुष्ठरोग सम्मेलनको उद्घाटन गर्दै प्रधानमन्त्री ओलीले यस्तो बताएका हुन् ।

उनले नेपालमा प्रति १० हजारमा एक भन्दा तलको संख्यामा कुष्ठरोगी रहनु सुधारको संकेत भए पनि रोग पूर्ण उन्मुलन नभएसम्म आफूहरू सन्तुुष्ट नहुने बताउए ।

उनले कुष्ठारोगजस्ता सङ्क्रामक रोग लागिहाले नियमित उपचारलाई जागरणकै रुपमै सञ्चालन गर्न आग्रह गरेका छन् ।

प्रधानमन्त्री ओलीले आफूूले पञ्चायतकालमा गोलघरमा रहँदा चिसो भुइँमा राखेर यातना दिइएको पनि स्मरण गरेका छन् । उनले त्यहीकारण आफ्नो मिर्गाैला फेल भएको सन्दर्भ पनि कार्यक्रममा वर्णन गरे ।

ओलीले पछिल्लो पटक २०७६ सालमा मिर्गौला प्रत्यारोपण गरेका थिए । मिर्गौलाले काम गर्न छाडेपछि २०६४ सालमा भारतको एपोलो अस्पतालमा पहिलो उनले पटक मिर्गौला प्रत्यारोपण गरेका थिए ।

२०६४ मा गरिएको मिर्गौलाले काम गर्न छाडेपछि २०७६ मा फेरि नयाँ मिर्गौला प्रत्यारोपण गरिएको थियो । अहिले प्रधानमन्त्रीको शरीरमा चारवटा मिर्गौला छन् ।

प्रधानमन्त्री ओलीले कुष्ठरोगीलाई हेलाँहोचो नगर्न कानुनमा संशोधन गर्ने र रोग सर्नबाट पनि बच्ने उपायका लागि सरकारले आवश्यक सहजीकरण गर्ने बताए ।

त्यस्तै उनले कुनै पनि रोग लुकाउनु हुँदैन भन्ने सन्देशसहित आमसञ्चार र सूचना प्रविधिका माध्यमबाट कुष्ठारोग निवारणका लागि जागरण फैलाउन स्वास्थ्य मन्त्रालयलाई आग्रह पनि गरे ।