काठमाडौं- गृहमन्त्री रमेश लेखकले नागरिक उन्मुक्ति पार्टी (नाउपा) का संरक्षक रेशमलाल चौधरी पक्राउ प्रकरणमा सरकारले पूर्वाग्रह नराखेको बताएका छन् ।

बिहीबार प्रतिनिधि सभामा उठेका प्रश्नहरुको जवाफ दिँदै उनले यसअघि अदालतबाट भएको पत्राचारको कार्यान्वयन गरेझैँ उक्त दिन पनि पत्र पाप्त भएपछि चौधरीलाई पक्राउ गरिएको उनले बताए ।

‘यसअघि सम्मानित अदालतबाट हुनेगरेको पत्राचारलाई प्रहरी प्रशासनले तत्काल कार्यान्वयन गरेझैँ यस घटनामा पनि सही नियतले कानुन कार्यान्वयन गर्ने मनशायबाहेक कुनै पूर्वाग्रह नरहेको अनुरोध गर्न चाहन्छु’, उनले भने, ‘भविष्यमा यस्ता घटना नदोहोरिनेतर्फ सबैलाई सजग र सचेत बनाएको निवेदन गर्न चाहन्छु ।’

यस घटनाले रेशम चौधरी उनका परिवारजन र साथीहरुलाई भएको पीडाप्रति उनले सदनसमक्ष दुःख व्यक्त गरेका छन् ।

रेशम चौधरीलाई थुनामा पठाउने भनेर अनाधिकृत रुपमा पत्र लेख्ने सर्वोच्च अदालतका शाखा अधिकृत महिमानसिंह विष्टलाई पक्राउ गरी कानुनी कारबाही थालिएको पनि गृहमन्त्री लेखकले बताएका छन् ।

यसअघिको बैठकमा रेशमलाई पक्राउ गरिएको घटनाको जवाफ माग गर्दै नागरिक उन्मुक्ति पार्टी र जनमत पार्टीका सांसदहरूले उठेर विरोध जनाएका थिए । त्यसपछि गृहमन्त्रीले उक्त घटनाका विषयमा जवाफ दिने जानकारी गराएको सभामुख देवराज घिमिरेले दिएका थिए ।

दुई पार्टीका सांसदहरूको विरोधका कारण नीति तथा कार्यक्रममाथि छलफल अघि बढाउन समस्या भएपछि सभामुख घिमिरेले उक्त घटनाबारे जानकारी गराउन सरकारको ध्यानाकर्षण गराएका थिए ।

नागरिक उन्मुक्ति पार्टी (नाउपा) का संरक्षक रेशम चौधरी पक्राउ परेका छन् । जनमत पार्टीसँग बुधबार हुने भनिएको एकताअघि उनलाई पक्राउ गरिएको हो ।

गत वैशाख १७ गते नाउपा र जनमतको एकता कार्यक्रममा सहभागी हुन काठमाडौंस्थित प्रज्ञा भवन पुगेका चौधरी पक्राउ परेका थिए ।

त्यस्तै गृहमन्त्री लेखकले तीनकुने क्षेत्रमा पुर्वराजाका समर्थकले गरेको प्रर्दशनका क्रममा विध्वंशात्मक घटनालाई सरकारले अत्यन्तै गम्भीरता पूर्वक लिएको बताए ।

उक्त घटनाका सम्बन्धमा अधिकार प्राप्त निकायबाट अनुसन्धान भैरहेको बताउँदै गृहमन्त्री लेखकले घटनामा संलग्नहरूलाई नियन्त्रणमा लिएर विना कुनै पूर्वाग्रह आवश्यक अनुसन्धान र अभियोजनको कार्य भइरहेको सदनमा जानकारी दिए ।

घटनाक्रमलाई विश्लेषण गर्दा यो नियोजित रुपमा आतंक र अराजकता फैलाउने आपराधिक तथा विध्वंशात्मक कार्य हो भन्ने कुरामा विवाद हुनै नसक्ने उनको भनाई छ । उनले संविधान विपरीतको कुनै पनि गतिविधि सैह्य नहुने स्पष्ट पारे ।

गृहमन्त्री लेखकले पश्चिम नेपाल भूकम्पबाट भएको जनधनको क्षतिको राहत, पुर्नस्थापनाको कार्यहरूले पछिल्लो दिनमा प्राथमिकता दिएर तिव्रता दिइएको जानकारी दिए। प्रभावित जिल्लाहरूमा विस्तृत क्षति आँकलनको कार्य अगाडि बढेको बताउँदै उनले हालसम्म  जम्मा ३७ हजार ९ सय ३८ घरको विस्तृत क्षति आँकलन सम्पन्न भएको जानकारी दिए । 

वर्षाका कारण हुनसक्ने सम्भावित जोखिमको विषयमा सरकार संवेदनशील रहेको उनको सदनमा जानकारी गराए ।