म्याग्दी– म्याग्दीको धौलागिरि गाउँपालिका–४ मुदी केन्द्रविन्दु भएर भूकम्प गएको छ ।

आज बिहान ३ बजेर १४ मिनेटमा मुदीलाई केन्द्रविन्दु बनाएर ४ म्याग्निच्युडको भूकम्प गएको राष्ट्रिय भूकम्प मापन केन्द्रले जनाएको छ ।

भूकम्पको धक्का धौलागिरि गाउँपालिकाको मुदीका साथै मुना, ताकम, मराङ, मल्कबाङ, दरबाङ, देवीस्थानलगायत पश्चिम म्याग्दीसहित आसपासका क्षेत्रमा महसुस भएको थियो ।

बिहानपख मानिसहरू सुतिरहेकै अवस्थामा ठूलो धक्का महसुस भएपछि धेरै मानिसहरू घर बाहिर निस्किएको धौलागिरि गाउँपालिका–४ मुदीका वडाध्यक्ष यामबहादुर घर्तीले बताए । उनका अनुसार, भूकम्पबाट अहिलेसम्म कुनै मानवीय र भौतिक क्षति भएको विवरण प्राप्त भएको छैन ।

यसअघि फागुन १३ गते पश्चिम म्याग्दीको  डाँडागाउँ आसपास केन्द्रविन्दु भएर ३.४, देवीस्थान आसपास केन्द्रविन्दु भएर ३.४ र मुना केन्द्रविन्दु भएर ३.५ म्याग्निच्युडको भूकम्म गएको थियो ।