काठमाडौं- अवैध कल सेन्टर सञ्चालनमा संलग्न भएको अभियोगमा दुईजना भारतीय नागरिकसहित ५३ जनालाई प्रहरीले पक्राउ गरेको छ।

भारतीय नागरिकहरूले नेपालीको समेत मिलेमतोमा ललितपुर महानगरपालिका-१५ सातदोबाटोस्थित घर भाडा‍मा लिई कल सेन्टर चलाएको खुलेको हो ।

उक्त कल सेन्टरबाट नेपाली युवा युवतीलाई धेरै रकम आम्दानी हुने प्रलोभन देखाएर गैरकानुनी काममा लगाएको आरोपमा उनीहरूलाई प्रहरीले पक्राउ गरेको हो।

नेपाल प्रहरीको केन्द्रीय अनुसन्धान ब्युरो (सीआईबी) का अनुसार उनीहरूलाई ल्यापटप ८५ थान, मोबाइल ९६ थान लगायत इलेक्ट्रोनिक्स उपकरणसहित पक्राउ गरिएको छ।

कल सेन्टरबाट सिंघम लोटरी, अन्ना लोटरी, भाउ लोटरी र इण्डसबेट लोटरी लगायत ग्याम्ब्लिङ एप्सहरूको दुरूपयोग गरी डिजिटल वालेटमा रकम जम्मा गर्न लगाएर सट्टाबाजी गर्ने गरेको अनुसन्धानबाट खुल्न आएको ब्युरो प्रवक्ता प्रहरी उपरीक्षक होविन्द्र बोगटीले बताए।

पक्राउ परेकामध्ये दुईजना भारतीय नागरिकसमेत सातजनाविरुद्ध सट्टाबाजी गर्न नहुनेसम्बन्धी कसुरअन्तर्गत मुद्दा दर्ता गरी अनुसन्धान भइरहेको छ ।

अन्य ४६ जनाविरुद्ध पनि प्रहरीले थप अनुसन्धान गरिरहेको प्रवक्ता बोगटीले जानकारी दिएका छन् ।