काठमाडौं- रुकुम पश्चिममा नयाँ राजनीतिक समीकरणले तनावको अवस्था ल्याउन थालेको छ। प्रगतिशील लोकतान्त्रिक पार्टी गठनपछि पहिलोपटक आइतबार गृहजिल्ला पुगेका जनार्दन शर्मालाई पुष्पकमल दाहाल प्रचण्ड नेतृत्वको नेकपाका कार्यकर्ताले रोक्ने कोसिस गरेका छन् ।

गृहजिल्लामा नयाँ दलबाट राजनीतिक गतिविधि सुरु गरेको दिन नै आइतबार उनलाई कालो झण्डा देखाएर नेकपा कार्यकर्ताले विरोध गरेका छन् ।

शर्मा नेपाल एयरलाइन्सको जहाजबाट सल्ले विमानस्थल झरेलगत्तै प्रचण्ड नेतृत्वको वर्तमान नेपाली कम्युनिस्ट पार्टी (साविकको नेकपा माओवादी केन्द्र) का कार्यकर्ताले कालो झण्डा प्रदर्शन गरे। विमानस्थलबाट बाहिर निस्केपछि नाराबाजी पनि चलेको स्थानीयले बताए।

शर्मा प्रगतिशील लोकतान्त्रिक पार्टी (प्रलोपा)ले आइतबार आयोजना गरेको युवा भेलामा सहभागी हुन रुकुम पुगेका हुन्।

उनले खलंगास्थित साविक माओवादी केन्द्रको पार्टी कार्यालयमा बोर्ड परिवर्तन गरी प्रलोपाको जिल्ला कार्यालय उद्घाटन गर्ने कार्यक्रम पनि तय भएको छ।

पार्टीका केन्द्रीय सदस्य तथा रुकुम संयोजक सन्देश केसीका अनुसार सोमबारदेखि विभिन्न भेटघाट, छलफल र अन्तरक्रिया गर्दै जिल्लामा राजनीतिक सक्रियता बढाइनेछ।

यस घटनाले रुकुमको माओवादी राजनीति नयाँ दिशातर्फ गएको संकेत दिएको विश्लेषकहरूको मूल्यांकन छ। विगतमा ठूलो शक्तिको विरोधमा साना समूहले कालो झण्डा देखाउने परम्परा थियो।

तर यसपटक उल्टो दृश्य देखिएको छ। रुकुममा बहुमत संरचना रहेको प्रचण्ड नेतृत्वको पार्टीका कार्यकर्ताले जनार्दन शर्माको सानो संरचना भएको नयाँ पार्टीविरुद्ध प्रदर्शन गरेपछि नेकपाको निषेधयुक्त राजनीति पनि देखिएको छ ।

पूर्वमाओवादी पृष्ठभूमिका दुई धारबीचको यस्तो तनावले रुकुममा राजनीति थप विखण्डित बनाउने सम्भावना छ। दुवै पक्षले संयमित राजनीति गर्न सके कांग्रेस र एमालेजस्ता दलहरूको लागि त्यति अवसर नखुल्ने चर्चा भइरहेको छ।

नेताहरूले एकअर्काको कार्यक्रममा विरोधभन्दा मर्यादित राजनीतिक व्यवहार अपनाएको भए राम्रो सन्देश जान सक्थ्यो भन्ने धारणा पनि स्थानीयमा सुनिन थालेको छ।