काठमाडौं- राष्ट्रिय स्वतन्त्र पार्टीले गत भदौ २३ र २४ गते देशभर भएको जेन-जी आन्दोलनलाई शासकीय अनैतिकता र असक्षमताको परिणाम भनेको छ।

रास्वपाले यो आन्दोलन अप्रत्याशित र आश्चर्यजनक दुवै नभएको टिप्पणीसमेत कार्यवाहक सभापति डीपी अर्यालले पेश गरेको राजनीतिक प्रतिवेदनमार्फत् भनेको छ।

रास्वपाले ढिलो चाँडो यस्तो हुनसक्ने भन्ने आशंका पहिले नै गरेको उल्लेख गर्दै सरकारलाई निरन्तर सचेत गराएको पनि दाबी गरेको छ।

तर तत्कालीन प्रधानमन्त्री केपी शर्मा ओलीले दम्भ र घमण्ड देखाउँदै गएपछि नागरिकमा भरिएको आक्रोश चुलिँदै विष्फोट भएको प्रतिवेदमा भनिएको छ।

जेन-जी आन्दोलन हुनुको पाँच सारसंक्षेप तयार पार्दै रास्वपाले दलीय सिन्डिकेट, राज्यदोहन, भ्रष्टाचार र कुशासनका कारण यस्तो घटना भएको उल्लेख गरेको छ।

‘भदौ २३ गतेको जेन-जी आन्दोलन र २४ गतेको विध्वंसात्मक घटनापछि राष्ट्रिय राजनीति फरक मोडमा आएको छ । तर यो मोड अप्रत्याशित र आश्चर्यजनक दुवै होइन किनकि ढिलो चाँडो यस्तो हुन सक्ने आशंका थियो’, प्रतिवेदनमा भनिएको छ, ‘हामीले पनि निरन्तर सचेत गराउँदै आएका थियौँ । संसदीय अङ्कगणितको बलमा शासकको अहंकार र दम्भ चुलिँदै गयो। अर्कातिर नागरिकमा चुलिएको आक्रोश विस्फोट हुने बिन्दुमा पुग्यो ।’

रास्वपाले यत्रो अकल्पनीय घटनापछि पनि तत्कालीन सरकारको नेतृत्व गरेको दल नेकपा एमालेले सत्य स्वीकार्नुको साटो आन्दोलनको भावना र म्यान्डेट बाहिर गएर गतिविधि गरिरहेको भनेको छ।

प्रतिवेदनमा भनिएको छ,‘केही सहायक कारण र घटनालाई समातेर वा अतिरञ्जित गरेर केही नेता आन्दोलनको खास कारण र सत्यको विषयान्तर गर्न उद्यत छन्’, प्रतिवेदनमा भनिएको छ, ‘यो प्रवृत्तिले निरन्तरता पाए आगामी दिनका लागि घातक हुन सक्छ।’