काठमाडौं- चार वर्ष लामो यात्रापछि नेकपा (एकीकृत समाजवादी) छाडेर नेकपा (एमाले) मा प्रवेश गर्न तयारीमा रहेकी नेतृ रामकुमारी झाँक्रीले पार्टी अध्यक्ष माधवकुमार नेपाललाई खुला पत्रमार्फत भावनात्मक सन्देश दिएकी छन्।

एकीकृत समाजवादीलाई नेकपा माओवादी केन्द्र नेतृत्वको नेपाली कम्युनिस्ट पार्टीमा विलय गराइसकेका नेपालका लागि रामकुमारीले सामाजिक सञ्जालमार्फत् सन्देश दिएकी हुन् ।

उनले शुक्रबार बिहान नेपाललाई सम्बोधन गर्दै पछिल्लो राजनीतिक निर्णयका कारण सहयात्रा गर्न नसकिएको उल्लेख गरेकी छन् ।

सन्देशमा उनले माधव नेपालप्रति सम्मान व्यक्त गर्दै पछिल्ला घटनाले उनको राजनीतिक यात्रालाई पुनः विवादमा ल्याएको उल्लेख गरेकी छन्।

‘आफ्नै बेइज्जती हुने कारबाही त नगरेको भए पनि हुने कमरेड?’, उनले भनेकी छन्, ‘अब कारबाहीको के अर्थ छ? लोकले के भन्ला भन्ने पनि सोच्नु भएन ?’

झाँक्रीले त्यसक्रममा माधव नेपालको लामो राजनीतिक भूमिका स्मरण गरेकी छन् । ‘तपाईंले १९ वर्ष पार्टी प्रमुखको रूपमा, बाँकी समय प्रमुखलाई चलाउने र नियन्त्रण गर्ने भूमिकामा रहेर काम गर्नुभयो’, उनले अगाडि भनेकी छन्, ‘तर यो अन्तिम घटनाले तपाईंको इतिहास फेरि बल्झाइदियो। बिर्सिएका सबै घटनाहरू अब फेरि स्मृतिमा फर्किएका छन्।’

उनले माधव नेपाललाई सम्बोधन गर्दै भावनात्मक शैलीमा लेखेर बिदा मागेकी हुन् । ‘जिन्दगीमा के लानु छ कमरेड? समाज र देशका लागि जीवन र जवानी अर्पण गर्ने मान्छेले लाने त एउटा मिठो वा तितो सम्झना मात्रै हो’, उनी भन्छिन्, ‘चिया पसलमा दुई जनाले बोल्ने कुरा, वश् त्यत्तिकै। आफ्नै मलामी त कसले पो देख्छ र ?’

उनले आफू र महासचिव घनश्याम भुसाललाई बुधबार गरिएको कारबाहीका लागि पनि उनले धन्यवाद दिएकी छन् । ‘हार्दिक धन्यवाद यो अन्तिम कर्मका लागि। बाँकी जीवन सुखद रहोस्, परिवारमा शान्ति र स्वास्थ्य रहोस् भन्ने हार्दिक शुभकामना’, उनी भन्छिन्,‘तपाईं जहाँ रहे पनि हाम्रो अभिभावक नै रहनुहुन्छ। मैले यसरी नै सधैँ सम्झने छु।’