काठमाडौं – प्रत्येक वर्ष भाद्र शुक्ल पूर्णिमाका दिन लाग्ने इन्द्रदह मेलामा करिब २५ हजार भक्तजनले सहभागिता जनाएका छन् ।

चन्द्रागिरि नगरपालिका–१ दहचोकमा लाग्ने मेला भर्न भक्तजनको घुइँचो लागेको हो । दहचोकको इन्द्रदहमा स्नान गर्नाले पारिवारिक सुख शान्ति र समृद्धि कायम हुने तथा जस्तोसुकै रोग पनि निको हुन्छ भन्ने जनविश्वास छ ।

सत्ययुगमा स्वर्गका राजा इन्द्र आएर सुनको मौलामा हात्ती बाँधी इन्द्रदहमा स्नान गरेको जनविश्वास रहिआएको छ ।

धार्मिक, ऐतिहासिक, पुरातात्विक र पर्यटकीय दृष्टिले महत्वपूर्ण रहेको दहचोकको उक्त कुण्डमा गए रातिदेखि नै मृतकका सम्झनामा दीप प्रज्वलन गर्दै बैकुण्ठ बासको कामना गरेका छन् । केही भक्तजनले वर्षा र सहकालका देवता इन्द्रको पूजा गरी स्नान गरेका थिए ।

पर्यटकीय गन्तव्यस्थलभित्रको इन्द्रदह नजिकै काजी कालु पाँडे समाधिस्थल क्षेत्र छ । उक्त क्षेत्र आसपासमा विभिन्न संरचना निर्माण गरिएका छन् । करिब २०० रोपनी क्षेत्रफलमा फैलिएको सांस्कृतिक महत्वको इन्द्रदह परिसरलाई पवित्र तीर्थस्थलका रुपमा विकास गर्न आवश्यक भौतिक पूर्वाधार, भ्यूटावर, बहुउद्देश्यीय भवनलगायत निर्माण गरिएको छ ।

दहचोकस्थित इन्द्रदह, मनकामना मन्दिर, ओढारलगायत पर्यटकीयस्थल प्रमुख आकर्षण मानिन्छन् । यहाँबाट दहचोक डाँडाबाट नीलगिरि, धौलागिरि, माछापुच्छ्रे, अन्नपूर्ण, मनास्लु, गणेश, लाङटाङ, गौरीशङ्कर, लाक्पादोर्जेलगायत हिमाल तथा गोरखा, नुवाकोट, रसुवा, धादिङ र काठमाडौँ उपत्यकाको मनोरम दृश्यावलोकन गर्न सकिन्छ । काठमाडौँको कलङ्कीदेखि पाँच किलोमिटर उत्तरपश्चिममा अवस्थित दहचोक प्राकृतिक सौन्दर्यका दृष्टिकोणले रमणीय र आकर्षकस्थल मानिन्छ ।