काठमाडौँ– नेपाली कांग्रेसका नेता डा. शेखर कोइरालाले जेनरेसन जेड (जेनजी) पुस्ताको आन्दोलनलाई सकारात्मक भन्दै उनीहरूको आवाज सुन्न सरकारसँग आग्रह गरेका छन्।

फेसबुकमार्फत् उनले भनेका छन्, ‘राजनीतिक दाउपेचको खासै मतलब नगर्ने, देशमै बसेर केही गर्छु भन्ने जेनजेड पुस्ताका होनहार युवाहरू सरकारको सामाजिक सञ्जाल बन्दको विरोधमा सडकमा उत्रनु, सरकारले बस्ने र उनीहरूबीचको सोचाइको अन्तर हो।’

कोइरालाले युवाको आवाज सुन्ने हिम्मत गर्नुपर्ने र आफैंलाई परिवर्तन गर्नुपर्ने आवश्यकता औंल्याए। उनले चेतावनी दिँदै भने, ‘नत्र पछि पछुताउनुको विकल्प पनि बाँकी रहने छैन।’

सामाजिक सञ्जाल नियमनका विषयमा सरकारले चालेको कदमविरुद्ध पछिल्ला दिनहरूमा देशभर जेनजेड पुस्ता सडकमा उत्रिएका छन्। कोइरालाको अभिव्यक्ति यसै आन्दोलनसँग जोडिएको मानिएको छ।