काठमाडौँ – सरकारले विद्युतीय सामाजिक सञ्जाल बन्द गरेको विरोधमा युट्यूबरहरूको छाता सङ्गठन (अनलाइन टीभी पत्रकार सङ्घ) आन्दोलनमा उत्रिएको छ ।

‘सरकारले पेटमा लात हानेको’ भन्दै अनलाइन टीभी पत्रकारहरू आन्दोलित भएका हुन्‌ । उनीहरूले आज (आइतबार) दिउँसो काठमाडौँको माइतीघर मण्डलामा विरोध र्‍याली निकालेका हुन्‌ ।

नेपालमा १० हजारभन्दा बढी अनलाइन टीभी सञ्चालनमा रहेको अनुमान छ । अनलाइन पत्रकार सङ्घमा मात्रै एक हजारभन्दा बढी अनलाइन टीभी आवद्ध छन्‌ ।

अनलाइन टीभी पत्रकार सङ्घका अध्यक्ष जीवन भण्डारीले अनलाइन टीभी पत्रकारहरूले अब कार्यालय बन्द गरेर क्यामेरासमेत डाउन गरी आन्दोलन अघि बढाइने बताए ।

‘सरकारले बोल्ने (अभिव्यक्ति) स्वतन्त्रतामात्र खोसेन, खाने मुख पनि थुन्यो’, भण्डारीले भने, ‘सामाजिक सञ्जालबाट विकृति फैलाइएको वहाना बनाउँदै सामाजिक सञ्जाल बन्द गरेको खासमा सरकारले आफ्नो विकृति ढाकछोप प्रयास गरेको हो, सरकारी कदमप्रति हाम्रो विरोध छ ।’