काठमाडौं– बलिउडका बादशा  शाहरुख खानकी छोरी सुहाना खान हाल आफ्नो जग्गा खरिद प्रकरणले विवादमा परेकी छन् ।

महाराष्ट्र सरकारले किसानलाई खेतीपातीका लागि उपलब्ध गराएको अलिबागस्थित थाल गाउँको जग्गा सुहानाले खरिद गरेपछि कानुनी प्रश्न उठेको हो ।

महाराष्ट्र कृषि भूमि ऐन, १९६१ अनुसार केवल किसान वा किसान परिवारसँग सम्बन्धित व्यक्तिले मात्र कृषि भूमि खरिद गर्न पौने नियम रहेको छ ।

गैर-किसानले यस्तो जग्गा किन्नु अघि कलेक्टरको स्वीकृति आवश्यक हुन्छ । तर, आरोप अनुसार सुहानाले अनुमति नलिई जग्गा खरिद गरेकी हुन् ।

भारतीय मिडिया अनुसार, सुहाना खानले यो विवादित जग्गा मुम्बईको कफ परेडमा बस्ने खोटे परिवारबाट करिब १२.९१ करोड भारतीय रुपैयाँमा खरिद गरेकी थिइन् । उक्त खरिदका लागि उनले झण्डै ७७.४६ लाख रुपैयाँ स्ट्याम्प शुल्क पनि तिरेकी थिइन् । 

सम्पूर्ण कारोबार २०२३ मे ३० मा स्ट्यान्डर्ड चार्टर्ड बैंकमार्फत सम्पन्न भएको बताइएको छ । तर, कागजी प्रक्रिया पूरा नगरेको र कलेक्टरको स्वीकृति नलिएको आरोप सुहाना माथि लगाइएको छ ।  

मुम्बई प्रहरीका आवासीय अधिकृतले यस सम्झौताको पूर्ण विवरण बुझ्नका लागि अलिबाग तहसीलदारसँग प्रतिवेदन मागेका छन्। यदि खरिदबिक्रीमा अनियमितता प्रमाणित भएमा कानुनी कारबाहीको सम्भावना देखिएको छ ।