काठमाडौं – एशिया कप अगाडि यूएईमा सम्पन्न त्रि–देशीय सिरिजको फाइनलमा आज पाकिस्तान र अफगानिस्तान भिड्दै छन्। आयोजक यूएईले कुनै पनि खेल जित्न नसकेको सिरिजको फाइनलमा अफगानिस्तान र पाकिस्तान आज नेपाली समय अनुसार राति ८:४८ बजे भिड्न लागेका हुन्।

पाकिस्तान र अफगानिस्तान चार खेलको सिरिजमा तीनतीन जित निकाल्दै फाइनल पुगेका हुन्। यूएईले भने घरेलु मैदानमा टेस्ट राष्ट्रसँगको सिरिजमा उत्कृष्ट प्रदर्शन गरे पनि जित निकाल्न सकेन। समूह चरणको अन्तिम खेलमा अफगानिस्तानसँग मात्र चार रनले पराजित भएको यूएईका लागि यो प्रतिस्पर्धा एसिया कपका लागि महत्त्वपूर्ण बन्नसक्छ।

प्रतियोगितामा तीनतीन खेलमा विजयी भएर समान ६ अंक बनाउँदै फाइनल पुगेका पाकिस्तान र अफगानिस्तानको फाइनल भेटलाई रोचक रुपमा हेरिएको छ। समान अंक भए पनि पाकिस्तान रनरेटका आधारमा तालिकाको शीर्ष स्थानमा रहँदै फाइनल पुगेको हो।