काठमाडौं- भारत र न्यूजील्याण्डले रक्षा सम्बन्धलाई थप मजबुत बनाउने प्रतिबद्धता व्यक्त गरेका छन् । दुई देशबीचका उच्चस्तरीय अधिकारीबीच भएको भेटमा रक्षा र सामरिक सहयोगलाई सुदृढ बनाउने प्रतिबद्धता व्यक्त गरिएको हो ।

भारतका रक्षा राज्यमन्त्री सञ्जय सेठ र न्यूजील्याण्डको रक्षा मन्त्रालयअन्तर्गत अन्तर्राष्ट्रिय शाखाकी प्रमुख क्याथलिन पियर्सबीच भेटवार्ता भएको हो ।

वार्ताका क्रममा द्विपक्षीय रक्षा साझेदारी, संयुक्त सैन्य अभ्यास, प्रविधि आदानप्रदान र क्षेत्रीय सुरक्षा चुनौतीहरूमा सहकार्य जस्ता विषयहरूमा छलफल भएको छ । दुवै देशले हिन्द प्रशान्त क्षेत्रमा शान्ति र स्थायित्व कायम गर्न संयुक्त प्रयास गर्ने सहमति जनाएका छन् ।

दुई मुलुकले आतंकवादविरुद्ध लड्ने, समुद्री सुरक्षा सुनिश्चित गर्ने, र साइबर सुरक्षामा सहकार्यलाई प्राथमिकता दिने उल्लेख गरेका छन् ।

दुवै देशले रक्षा प्रविधि र नवप्रवर्तनमा संयुक्त अनुसन्धान र विकासलाई प्रोत्साहन गर्ने प्रतिबद्धता व्यक्त गरेका छन् । यो कदमले दुई देशबीचको रणनीतिक सम्बन्धलाई थप बलियो बनाउने अपेक्षा गरिएको छ ।