काठमाडौं – फिल्म ‘माग्ने राजा’ मा अनुबन्ध भएदेखि टिकटकर मिस पबी (पवित्रा साकी) चर्चामा छिन् । टिकटकको चर्चित प्रोफाइल भएकाले डेब्यू फिल्म साइन गरेपछि स्वाभाविक रूपमा उनको चर्चा भएको थियो ।

त्यसमाथि निर्माण पक्षले मिस पबीलाई अनुबन्ध क्रममै हाइलाइट गरेको थियो । छायाङ्कनका क्रममा पनि उनी चर्चामा आइन्‌ ।

अभिनय गर्न नसकेको भन्दै भूमिका छोट्याइएपछि उनी चर्चामा आएकी थिइन् । अर्थात्, कमजोर अभिनय क्षमताले पनि उनलाई चर्चामा ल्यायो ।

पविले अभिनय गर्न नसकेपछि भूमिका छोट्याएर बाँकी अंशका लागि फिल्ममा अर्कै व्यक्तिलाई अनुबन्ध गरेको चर्चा छ । यो कुरा निर्माण पक्ष निकट स्रोतले खबरहबलाई बताएको हो ।

माग्ने राजाको पोस्टर, टिजर र गीतहरूमा उनलाई नदेखेपछि खोजी भएको थियो । फिल्मबाटै निकालिएको चर्चा पनि चलेको थियो ।

निर्देशक ऋषि लामिछानेले उक्त चर्चा झुटो भएको दाबी गरेको थिए । नभन्दै मिस पबीलाई ट्रेलरमा देखाइएको छ, तर झुलुक्क !

निर्माण पक्षले बिहीबार ‘माग्ने राजा’को ३ मिनेट ४० सेकेन्ड लामो ट्रेलर सार्वजनिक गरेको छ । मिस पबीलाई ट्रेलरमा जम्मा १ सेकेन्ड देख्न सकिन्छ । पज गरेर नहेर्ने हो भने उनलाई चिन्न मुस्किल हुन्छ ।

२ मिनेट ४८ सेकेन्डमा मिस पबीले फिल्मका नायक केदार घिमिरे ‘माग्ने बूढा’को अन्तवार्ता लिएको दृश्य देख्न सकिन्छ ।

जे होस्, मिसपबी ट्रेलरमा अटाएकी छन् । फिल्मको प्रचार सामग्रीमा उनको अनुहार देखिएको छ ।

यत्रो हल्लाखल्लाबीच उनले कस्तो अभिनय गरिन् होला, त्यो हेर्न अब धेरै दिन बाँकी छैन । यो फिल्म भदौ ६ बाट प्रदर्शनमा आउँदैछ ।

फिल्ममा केदार र नायिका वर्षा शिवाकोटी शीर्ष भूमिकामा छन् । फिल्मका लेखक सामीप्यराज तिमल्सेना हुन् ।

आरम्भ प्रोडक्सनको ब्यानरमा बनेको यो फिल्म मुनाल घिमिरेले निर्माण हुन्‌ ।