काठमाडौं– नेकपा एमालेका महासचिव शङ्कर पोखरेलले मुलुकमा बहुदलीय व्यवस्था स्थापना पछि कांग्रेस र एमालेमा पटक पटक मुख्य नेतृत्व फेरिए पनि नेकपा माओवादीमा एउटै व्यक्ति हाबी भएको सङ्केत गरेका छन् ।

उनले बिहीबार सामाजिक सञ्जालमार्फत २०४६ सालको राजनीतिक परिवर्तनपछि नेतृत्व निर्माणका दृष्टिले कांग्रेस र एमालेमा फेरबदल भइरहे पनि माओवादी केन्द्रमा भने सुरुको नेतृत्वमा कुनै परिवर्तन नआएको आशय व्यक्त गरेका छन् ।

उनले बहुलदीय व्यवस्था पछि एमालेमा मदन भण्डारी, मनमोहन अधिकारी, माधवकुमार नेपाल, झलनाथ खनाल र केपी शर्मा ओलीले मुख्य नेतृत्व गरेको जनाएका छन् ।

यस्तै, नेपाली कांग्रेसमा कृष्णप्रसाद भट्टराई, गिरिजाप्रसाद कोइराला, सुशील कोइराला र शेरबहादुर देउवाले पार्टीको नेतृत्व गर्दा नेकपा माओवादी केन्द्रमा भने पुष्पकमल दाहाल प्रचण्डको एकल नेतृत्व चलिरहेको उल्लेख गरेका छन् ।