काठमाडौं– नेपाली कांग्रेसका महामन्त्री विश्वप्रकाश शर्माले सभापति शेरबहादुर देउवालाई छैटौंपटक प्रधानमन्त्री नबनेर मार्गप्रशस्त गर्न आग्रह गरेका छन् । 

कांग्रेस केन्द्रीय कार्यसमिति बैठकमा सोमबार उनले नेकपा एमालेसँगको सत्ता समीकरणमा प्रधानमन्त्रीका लागि प्रतीक्षामा रहेका देउवालाई प्रधानमन्त्री नबनेर सम्मानजनक बिदाइ लिन आग्रह गरेका हुन् । 

‘तेस्रोपटक सभापति बन्न विधानले दिँदैन, अब ०८३ असारमा आफू छैटौंपटक प्रधानमन्त्री बन्नतिर नलागेर अरु साथीलाई बन्न मार्गप्रशस्त गरेर, प्रशंसा जित्नुपर्छ सभापतिले,’ शर्माले भने । 

सम्मानजनक बहिर्गमनको बाटो रोज्दा नेपालको राजनीतिमा सभापति देउवाको प्रभाव अत्यन्तै सम्मानजनक हुने उनको भनाइ थियो ।

 ‘सम्मानजनक बहिर्गमनको बाटो सभापतिले रोज्नुभएमा त्यसले नेपालको राजनीतिमा अत्यन्तै सकारात्मक प्रभाव छोड्ने छ,’ महामन्त्री शर्माले भने ।