काठमाडौं– नेपाली कांग्रेसका सभापति शेरबहादुर देउवाले पार्टीको १५ औँ महाधिवेशनको मिति तोक्नुपर्ने बताउँदै आएका नेताहरूलाई जवाफ फर्काएका छन् ।

सानेपामा जारी कांग्रेस केन्द्रीय कार्यसमिति बैठकमा सोमबार नेताहरूले उठाएका प्रश्नको जवाफ दिने क्रममा उनले चार वर्षे नियमित कार्यकाल भए पनि विधानअनुसार एक वर्ष थप्न पाउने र संविधानअनुसार अरू ६ महिना कार्यकाल लम्ब्याउन पाउने अधिकार रहेको स्मरण गराएका हुन् ।

‘नेपालको संविधानअनुसार ६ महिना बढाउन पाइन्छ । नेपालको पार्टीको विधानअनुसार चार वर्षभन्दा बढ्ता पाइँदैन, मैले भनेकै हो,’ बैठकस्थलबाट प्राप्त छोटो अडियोमा सभापति देउवाले भनेका छन्, ‘नेपालको संविधानको कुरा गरेको हो मैले । संविधान मान्ने मान्छे हो ।’

अडियोमा देउवाले ‘मैले के गर्छु, के गर्दैन त्यो मेरो आफ्नो कुरा हो । म छोड् भनेर छोड्ने मान्छे होइन । म अप्ठ्यारो मान्छे हो है’ भनेको पनि सुनिन्छ । उनले यसो भन्दै गर्दा कांग्रेसको बैठक कक्षमा हाँसोको फोहरा नै छुटेको अडियो क्लिपमा सुनिन्छ ।

सभापति देउवाले उक्त जवाफ कुन प्रसंगमा दिएका हुन् भन्ने खुलेको छैन । तर, स्रोतका अनुसार उनले महामन्त्री विश्वप्रकाश शर्मालाई उक्त जवाफ दिएका हुन् ।

‘महामन्त्रीले बैठकमा सभापतिलाई अभिभाकत्व निर्वाह गर्न आग्रह गर्नुभएको थियो,’ बैठकमा सहभागी स्रोतको भनाइ छ, ‘उहाँ बोलेर फर्किँदै गर्दा सभापति बोल्नु भएको हो ।’