काठमाडौं– नेपाली कांग्रेसका नेता डा. शेखर कोइरालाले पार्टीका नेता–कार्यकर्ताहरूलाई केन्द्रीय कार्यसमितिको म्याद थप्नुको कारणबारे पदाधिकारीसमक्ष प्रश्न गर्न आग्रह गरेका छन् । 

भक्तपुरको लोकन्थलीमा शनिबार कांग्रेस सिन्धुली–काठमाडौं सम्पर्क समितिको प्रथम सम्मेलनलाई सम्बोधन गर्दै उनले पार्टी सभापतिदेखि पदाधिकारीहरूलाई एक वर्ष समयावधि थप्नुको कारणबारे प्रश्न गर्न आग्रह गरेका हुन् । 

‘तपाईंहरूले पदाधिकारीहरूलाई प्रश्न गर्नुस्, के कारणले थप्ने भनेर, प्रश्न किन गर्न सक्नुहुन्न तपाईंहरू ?,’ नेता कोइरालाले भने, ‘तपाईंहरू गइरहनुहुन्छ, भेटिरहनुहुन्छ सभापतिलगायत पदाधिकारीहरूलाई, किन तपाईंहरूले अधिवेशन गर्न सकिरहनुभएको छैन ? भनेर सोध्नु पर्‍यो ।’

उनले चार वर्षभित्रै पार्टीको महाधिवेशन हुनुपर्छ भनेर सबैले भन्नुपर्नेमा जोड दिए । ‘समयमा अधिवेशन हुनुपर्छ भनेर हामीहरूले भनौँ,’ कोइरालाले भने, ‘त्यो समय भनेको चार वर्ष हो भन्ने कुरा पनि भन्नुपर्छ ।’

नेता कोइरालाले अहिलेकै जसरी पार्टी सञ्चालन गर्दै गए कांग्रेस र कांग्रेसका नेता–कार्यकर्ताहरूको भविष्य कमजोर हुने पनि बताए ।

 ‘सधैँ नेपाली कांग्रेसलाई यसैगरी चलाउने हो भने नेपाली कांग्रेसको भविष्य कमजोर हुन्छ,’ उनले भने, ‘तपाईंहरू कमजोर हुनुहुन्छ ।’