काठमाडौं- काठमाडौंको नक्सालस्थित बाल मन्दिरको जग्गा हिनामिना प्रकरणमा १७ जनाविरुद्ध जिल्ला अदालत काठमाडौंमा मुद्दा दायर गरिएको छ ।

नेपाल प्रहरीको केन्द्रीय अनुसन्धान ब्युरो (सीआईबी) ले बुझाएको अनुसन्धान प्रतिवेदनका आधारमा जिल्ला सरकारी वकिल कार्यालयले थप छानबिनपछि मुद्दा बुझाएको हो ।

उक्त मुद्दामा नेपाल बाल संगठनकी तत्कालीन अध्यक्ष रीतासिंह वैद्यसहित १७ जनालाई प्रतिवादी बनाइएको छ । यो मुद्दामा भारतीय नागरिकलाई पनि प्रतिवादी बनाइएको छ । सीआईबीले यो मुद्दाका प्रतिवादीविरुद्ध ६० करोडभन्दा बढी रकम मागदाबी गरेको छ।

बाल संगठनले आफ्नो जग्गा सस्तोमा भाडामा दिएको थियो । १७ वर्ष सम्झौता अवधि बाँकी छँदै फेरि थप ३८ वर्ष भाडामा दिने सम्झौता गरेको भन्दै संगठनका पूर्वपदाधिकारीविरुद्ध ठगी आरोपमा प्रहरीको केन्द्रीय अनुसन्धान ब्यूरोमा (सीआईबी)मा उजुरी परेको थियो ।

यस मुद्दाका प्रतिवादीमा बाल संगठनका तत्कालीन उपाध्यक्ष तुलसीनारायण श्रेष्ठ, तत्कालीन महासचिव गणेशभक्त श्रेष्ठ, तत्कालीन सदस्य एवम् श्रोत तथा परिचालन उपसमिति संयोजक कृष्णशंकर साह, तत्कालीन अख्तियार प्राप्त महासचिव श्यामकुमार आले छन् ।

त्यसैगरि तत्कालीन अख्तियार प्राप्त महासचिव सुवाशकुमार पोखरेल, तत्कालीन महासचिव प्रचण्डराज प्रधान, तत्कालीन महासचिव रामकाजी गुरुङ, तत्कालीन उपाध्यक्ष योगेन्द्रबहादुर शाहीविरुद्ध पनि मुद्दा चलाइएको छ ।

त्यसैगरि तत्कालीन उप–कोषाध्यक्ष दीपदास श्रेष्ठ, बृहस्पति विद्यालय व्यवस्थापन प्रालि सञ्चालकहरू प्रविणराज जोशी, मुरारीनीधि तिवारी, पुरुषोत्तमराज जोशी, श्रद्धा संघाई, अभिवन सिंघानिया, सिद्धार्थ केडिया र कीर्तिप्रसाद पाण्डेविरुद्ध पनि मुद्दा चलेको छ ।

यस प्रकरणमा भारतको कर्नाटक राज्यस्थित बेंगलुरूका कीर्तिप्रसाद पाण्डेविरुद्ध पनि मुद्दा चलाइएको छ । उनी बाल मन्दिर हाताभित्र सञ्चालित बृहस्पति विद्या सदनका सञ्चालक हुन् । उनले सञ्चालन गरेको राई स्कुलले पनि बालमन्दिरको जमिन हडपेको छ । पाण्डे नेपालमा बसोबासरत भारतीय नागरिकको एक संस्थाका अध्यक्षका रुपमा रहेका छन् ।