सुर्खेत- प्रधानमन्त्री केपी शर्मा ओलीले कर्णालीका मानिसले महाभारत युद्ध लडेको बताएका छन् ।

मध्यपश्चिम विश्वविद्यालयमा आयोजना गरिएको दीक्षान्त समारोहलाई सम्बोधन गर्दै उनले कर्णालीका मानिसहरूको लामो इतिहास रहेको बताएका हुन् ।

कर्णालीका मानिसहरू महाभारत युद्ध लड्न गएको बताए । ‘यहाँका मानिसहरू महाभारतका लडाइँमा गएका थिए । यहाँका मानिसले घुइत्रो हानेपछि जहाँ छोयो, त्यही छेड पार्थे,’ उनले भने, ‘यहाँको सभ्यताको लामो इतिहास छ । हाम्रा पुर्खाहरूले कैलाश पर्वत मानसरोवर नाम राखेका थिए ।’

त्यस अवसरमा प्रधानमन्त्री एवं मध्यपश्चिम विश्वविद्यालयका कुलपति ओलीबाट विश्वविद्यालयको तेस्रो दीक्षान्त समारोहका अवसरमा विभिन्न तह र सङ्कायका तीन हजार आठ सय ४१ विद्यार्थी दीक्षित भएका छन् ।

वीरेन्द्रनगरस्थित विश्वविद्यालयको केन्द्रीय कार्यालयमा आयोजित समारोहमा ती विद्यार्थी दीक्षित भएका हुन् ।

समारोहमा विज्ञान तथा प्रविधि, व्यवस्थापन, इञ्जिनियरिङ, कानुन, शिक्षाशास्त्र, मानविकी र सामााजिकशास्त्र गरी सबै सङ्कायबाट स्नातक तहका दुई हजार एक सय ८९, स्नातकोत्तर तहका विभिन्न कार्यक्रममा शैक्षिक सफलता हासिल गरेका एक हजार छ सय ६३ र व्यवस्थापन संकायको दर्शनाचार्य पूरा गरेका १९ विद्यार्थी दीक्षित भए ।