काठमाडौं- उपप्रधानमन्त्री तथा सहरी विकासमन्त्री प्रकाशमान सिंहले काम गर्नेहरूलाई हावादारी गफ गर्नेसँग तुलना गर्न नमिल्ने बताएका छन् ।

शुक्रबार काठमाडौं महानगरपालिका वडा नं. २९ को वडा कार्यालय भवन उद्घाटन गर्दै मन्त्री सिंहले यस्तो बताएका हुन् ।

‘संविधान जारी गरेको कुरा केही होइन भन्छन् । के गर्दा ठूलो कुरा हुने यहाँ ? काम गर्नेलाई हावादारी गफ गर्नेसँग तुलना गरेर हुन्छ ?’, उनले भने,‘तपाईं-हामीले हो-हल्ला गर्नु पछाडिको नियत के हो ? बुझ्नुपर्‍यो । हो-हल्ला गर्नेको पृष्ठभूमि कसैले नबुझ्ने ।’

उनले हाल सहकारी मुद्दा झेलिरहेका राष्ट्रिय स्वतन्त्र पार्टीका सभापति रवि लामिछानेमाथि पनि कटाक्ष गरेका छन् । ‘विदेशमा कति हजार डलर कमाइरहेको पनि देशमा आएको भनेर भन्छन्’, उनले भने, ‘हजार डलरको जागिर छोडेर आएको कि केही काण्ड गरेपछि फर्केर आएको हो ? त्यो पनि बुझ्नुपर्‍यो नि !’

उपप्रधानमन्त्री सिंहले राजनीति गर्न असल चरित्र नचाहिने हो ? भन्दै प्रश्न गरे । राजनीतिमा लागेर सेवा गर्ने र ठगी खानेहरू अन्तर पनि ठण्डा दिमागले लेखाजोखा गर्न उनले आग्रह गरे ।

सरकार स्थिर होस् भन्ने नागरिकको चाहनाअनुसार कांग्रेस-एमाले मिले उनले बताए । अब अर्थतन्त्र चलायमान बनाउँदै लयमा ल्याउन पुसमा ६ वटा अध्यादेश ल्याइएको पनि उनले बताए ।

सिंहले सार्वजनिक जग्गा जनता लागि हुनुपर्ने बताउँदै स्थानीयले उपभोग गर्न पाउने पनि उल्लेख गरे । सरकारले त्यसका लागि काम गरिरहेको बताएका उनले नागरिक तहबाट साथ दिन पनि आग्रह गरेका छन् ।