काठमाडौं– पश्तुन सहफुज मुभमेन्टले बेपत्ता पारिएका पाकिस्तानका हजारौँ पश्तुन नागरिकलाई रिहा गर्न आह्वान गरेको छ । पश्तुन समुदायको मानव अधिकारका लागि अभियान सञ्चालन गर्दै आएको यस संस्थाका अनुसार हाल पाकिस्तानका हजारौँ पश्तुन नागरिकको अवस्था अज्ञात छ ।

यस संस्थाको हल्याण्ड शाखाले सामाजिक सञ्जाल एक्समा पोस्ट गर्दै पश्तुनहरुलाई जबरजस्ती बेपत्ता पारिएको, यातना दिइएको, कुन कानुनी आधारबिना हिरासतमा राखिएको र न्यायको पहुँचबाट टाढा राखिएको आरोप लगाएको छ । संस्थाले यसरी अज्ञात अवस्थामा रहेका सबै नागरिकलाई रिहा गर्न पनि आह्वान गरेको छ ।

हाल यस संस्थाका महत्वपूर्ण नेता तथा कार्यकर्ता जेलमा छन् । कतिपय अवस्थामा अदालतबाट निर्दोष साबित भएपनि उनीहरुलाई रिहा गरिएको छैन ।

अली वजिर यस संस्थाका वरिष्ठ नेता हुन् । उनी विगत दुई वर्षदेखि जेलमा छन् । विभिन्न अदालतले उनलाई निर्दोष साबित गरेपनि उनलाई रिहा गरिएको छैन ।

त्यसैगरी, खैबर कौमी जिरगाका अगुवा हाजी अब्दुल समाद र सामाजिक अभियन्ता बिलाल ओरकजाईलाई पनि मिथ्या आरोपमा कारागारमा राखिएको छ ।

पश्तुन तहफुज मुभमेन्टले नागरिकलाई असर पर्नेगरी अफगान भूमिमा हुने सैन्य कारवाहीको पनि विरोध गरेको छ । त्यसैगरी, यस संस्थाले पश्तुन समुदायलाई लक्षित गरी सञ्चलन हुँदै आएको नीतिमा पनि पुनर्विचार गर्न पाकिस्तानको राज्य र सेनासमक्ष आग्रह गरेको छ ।