काठमाडौं- तिब्बती समुदायले अष्ट्रेलियामा प्रदर्शन गरेका छन् । आफ्नो र स्वदेशमा रहेका आफ्ना परिवारको सुरक्षाप्रति चिन्ता व्यक्त गर्दै अष्ट्रेलियामा रहेका तिब्बती समुदायले प्रदर्शन गरेका हुन् ।

संसद भवनमा आयोजित प्रदर्शनमा उनीहरुले धार्मिक स्वतन्त्रताको माग गरेका थिए । प्रदर्शनकारीले तिब्बती जनताविरुद्ध चिनियाँ कम्युनिष्ट पार्टीले दमन जारी राखेको भन्दै आक्रोश व्यक्त गरे ।

प्रदर्शनमा सहभागी याङ्क्यी साङ्पोले अष्ट्रेलियामा बसोबास गरिरहेका तिब्बतीलाई पनि चीनले डर देखाइरहेको र दमन गरिरहेको बताइन् । चीनमाथि सन् १९५१ मा कब्जामा लिएदेखि तिब्बतमा मानव अधिकार उल्लङ्घ गरिरहेको आरोप लाग्ने गरेको छ ।

चीनले तिब्बतमा राजनीतिक आस्थाका आधारमा मानिसहरुलाई नियन्त्रणमा लिने, यातना दिने, जबरजस्ती गर्भपतन गराउने, मानिसहरुलाई विस्थापित गर्नेजस्ता गतिविधि गर्दै आएको बताइएको छ । चीनले यस्तो आरोपको खण्डन गर्दै आएको छ ।

तिब्बतमा जन्मेकी साङ्पो चार महिनाको हुँदा उनका पितालाई जेल हालिएको थियो । त्यसपछि उनको परिवार विस्तापित हुन पुग्यो ।

हाल २६ वर्षीया साङ्पो १४ वर्ष हुँदासम्म चीनकै शासनमा हुर्किन बाध्य भइन् । १४ वर्षको उमेरमा उनी न्यूक्यसल पुगिन् ।

‘मलाई ६ वर्षको हुँदा चिनियाँ उपनिवेशवादी विद्यालयमा पढ्न बाध्य पारिएको थियो । अरु तिब्बती बच्चाजस्तै म पनि आफ्नो तिब्बती पहिचानसँग टाढिएकी थिएँ ।’ उनले भनिन् ।

‘म तिब्बती मूलकी अष्ट्रेलियन नागरिकका रुपमा सुरक्षित महसुस गर्न चाहन्छु । तिब्बती समुदायलाई चिनियाँ कम्युनिष्ट पार्टीले प्रत्यक्ष वा अप्रत्यक्ष रुपमा डर देखाउँदै आएको छ ।’ उनले भनिन् ।