विराटनगर– नेपाली कांग्रेसका सभापति शेरबहादुर देउवाले पूर्वराष्ट्रपति र उपराष्ट्रपतिलाई सक्रिय राजनीतिमा फर्कन संविधानले नरोकेको बताएका छन्।

शनिबार विराटनगर विमानस्थलमा पत्रकारहरूसँग कुरा गर्दै देउवाले पूर्वराष्ट्रपति विद्यादेवी भण्डारी र पूर्वउपराष्ट्रपति नन्दबहादुर पुनको राजनीतिक सक्रियता अस्वाभाविक मान्न नभएको बताए। संविधानले राजनीतिक दलमा आबद्ध हुन पूर्वराष्ट्रप्रमुखलाई नरोकेको पनि देउवाले बताएका छन् ।

नेकपा (एमाले)ले गत साउन ५-६ को केन्द्रीय कमिटी बैठकबाट भण्डारीको सदस्यता नवीकरण नगर्ने निर्णय गरेको छ । पूर्वउपराष्ट्रपति नन्दबहादुर पुन माओवादी केन्द्रमा फर्किएर उपाध्यक्ष बनिसकेका छन् ।

देउवाले दुईतिहाइ बहुमत जुटे मात्रै संविधान संशोधन अघि बढ्ने बताएका छन् । दलहरूसँग छलफल भइरहे पनि निष्कर्षमा ननिस्किएको उनले बताए ।

प्रधानमन्त्री केपी शर्मा ओली नेतृत्वको सरकारबाट मन्त्री फिर्ता बोलाउनेबारे कांग्रेमा छलफल नभएको देउवाले बताए ।