काठमाडौं– दोस्रो राष्ट्रिय आर्टिफिसियल इन्टेलिजेन्स सम्मेलन आज (शनिबार) ललितपुरको  होटल हिमालयमा हुने भएको छ । सम्मेलनको संघीय संसदका सभामुख देवराज घिमिरेले उद्घाटन गर्ने कार्यक्रम छ ।

‘एआई एण्ड डिभलपमेन्ट : ब्रिजिङ द ग्याप, बिल्डिङ द अपरचुनिटिज’ भन्ने नाराका साथ सम्पन्न हुने सम्मेलनका छलफल सत्रहरूमा ‘विश्वव्यापी एआई प्रतिस्पर्धामा विकासोन्मुख राष्ट्रको दृष्टिकोण’, ‘नेपालको बैंक तथा वित्तीय रूपान्तरणका लागि एआई’, ‘सीमित स्रोतसाधन परिवेशमा गुणस्तरीय स्वास्थ्यका लागि एआई’, र ‘मिडियादेखि राजनीतिसम्म : जेनरेटिभ एआई जमानाको मिथ्या सूचनाको परिदृश्य’ जस्ता रहेका छन् ।

डिजिटल मिडिया फाउन्डेसनले आयोजना गर्ने सम्मेलनमा इन्टरनेट सोसाइटी नेपाल शाखा, युएनडिपी नेपाल, युनेस्को काठमाडौं, डिजिटल फ्रिडम कोलिसन, रोबोटिक एसोसिएसन नेपाल र डिजिटल राइट्स नेपालको सहकार्य रहेको छ ।

सम्मेलनमा एसिया–प्यासेफिक क्षेत्रका डिजिटल ट्रान्सफरमेसन थिङ्क ट्यांक श्रीगणेश लोकनाथन विशेष वक्ताका रूपमा रहेका छन् ।

छलफलमा युनिभर्सिटी अफ नर्थ क्यारोलिनाका प्राध्यापक नीर क्षेत्री, ब्रिटिस काउन्सिलकी शिक्षा प्रविधि प्रमुख निनाज इचापोरिया, युनेस्को नेपाल प्रमुख याको दु तोइट लगायतका विज्ञहरूले आफ्नो विचार प्रस्तुत गर्नेछन् ।