काठमाडौं- पाकिस्तान प्रशासित जम्मु कश्मीरमा पूर्वाधारको अवस्था दयनीय रहेको भन्दै स्थानीयहरुले आक्रोश व्यक्त गरेका छन् । सो क्षेत्रमा व्याप्त भ्रष्टाचारका कारण पूर्वाधारको विकास हुन नसकेको उनीहरुको आरोप छ ।

कश्मीर ब्रेकिङ न्यूजका अनुसार पाकिस्तान प्रशासित जम्मु कश्मीरमा सडक, स्वास्थ्य सेवा, शिक्षा र खानेपानीजस्ता आधारभूत सुविधाहरूको चरम अभाव छ । यस कारण स्थानीयहरुको जीवनयापनमै कठिनाइ आइरहेको समाचारमा उल्लेख छ ।

स्थानीय बासिन्दा तथा सामाजिक कार्यकर्ताहरूले सरकारी अधिकारी र ठेकेदारको मिलेमतोमा विकास बजेटको दुरुपयोग हुने गरेको आरोप लगाएका छन् । ठूला परियोजनाका लागि छुट्याइएको रकम व्यक्तिगत लाभका लागि हिनामिना हुने गरेको जनाइएको छ । भ्रष्टाचारका कारण पूर्वाधार निर्माणका परियोजनाहरू अधुरै रहने वा गुणस्तरहीन हुने गरेको उनीहरूको गुनासो छ ।

कतिपय अवस्थामा ग्रामीण क्षेत्रमा सडक निर्माण र मर्मतका लागि छुट्याइएको बजेट बारम्बार गलत ठाउँमा प्रयोग भएको पाइएको छ । जसले विकट गाउँलाई बाहिरी बजार र सेवाको पहुँचबाट वञ्चित गरेको छ ।

शिक्षा र स्वास्थ्य सेवाको अवस्था पनि उस्तै छ । अस्पतालहरूमा आधारभूत उपकरण र औषधिको अभाव छ । विद्यालयमा शिक्षक र शैक्षिक सामग्रीको कमी देखिएको छ । स्वच्छ खानेपानीको अभावका कारण धेरै गाउँबस्तीमा पानीजन्य रोगहरू फैलिन थालेको छ ।

स्थानीय सामाजिक कार्यकर्ताले प्राकृतिक रुपमा सम्पन्न भएपनि यो क्षेत्रका स्थानीय समुदायले जलविद्युत र खनिजजस्ता स्रोतको लाभ हासिल गर्न नसकेको बताएका छन् । पारदर्शी शासन र जवाफदेहीताको माग गर्दै सो क्षेत्रमा बारम्बार विरोध प्रदर्शन पनि हुने गरेको छ ।