काठमाडौं- पाकिस्तानमा जबरजस्ती बेपत्ता पारिएका एक जना बलोच समुदायका व्यक्तिको रिहाइको माग गर्दै प्रदर्शन गरिएको छ । पाकिस्तानको कराँची शहरमा अमीर बख्श बालोचको परिवारले प्रदर्शन गरेका हुन् ।

अमीर बख्शलाई विगत ११ वर्षदेखि बेपत्ता छन् । परिवारले उनलाई जबरजस्ती बेपत्ता पारिएको आरोप लगाउँदै आएको छ ।

द बालोचिस्तान पोष्टका अनुसार परिवारले कराँची प्रेस क्लबबाहिर प्रदर्शन गरेको हो । प्रदर्शनकारीले अमीर बख्शको अवस्थाबारे तत्काल जानकारी दिन र उनको तत्काल रिहाइको माग गरेका छन् ।

परिवारले जनाए अनुसार अमीर बख्शलाई सन् २०१४ मा सुरक्षाकर्मीले नियन्त्रणमा लिएका थिए । त्यसयता उनको अवस्था अज्ञात छ ।

बलोचिस्तानमा लामो समयदेखि पृथकतावादी आन्दोलन हुँदै आएको छ । यस आन्दोलनलाई दबाउनका लागि पाकिस्तानी सेनाले बलोचिस्तानमा गैरन्यायिक हत्या, जबरजस्ती बेपत्ता, अपहरण र अन्य हिंसात्मक कारवाही सञ्चालन गर्दै आएको छ ।

हालसम्म सुरक्षाकर्मीले बलोचिस्तानमा हजारौं जनालाई जबरजस्ती बेपत्ता पारेको मानव अधिकारवादी संस्थाहरुले बताएका छन् ।