काठमाडौं– नेकपा एमालेका सांसद गोकुल बास्कोटाले संविधान संशोधनबारे संसद्मा प्रश्न उठाएका छन् ।

प्रतिनिधिसभाको बुधबारको बैठकमा बोल्दै सांसद बास्कोटाले वर्तमान नेपाली कांग्रेस र नेकपा एमालेको गठबन्ध सरकारले संविधान संशोधन प्रक्रिया कहाँ पुर्‍यायो ? भनेर प्रश्न गरेका हुन् ।

उनले अहिले देशमा देखिएको निराशा चिर्न सरकारले प्रयत्न गर्नुपर्ने बताउँदै ०८१ असार १७ गते भएको दुई ठूला दलको सहमतिअनुसार संविधान संशोधनको अवस्था के भयो ? भनेर पनि सोधेका छन् ।

‘हामीले अहिले जनताबीच देखिएको निराशा चिर्नुपर्छ। आजको सत्ता समीकरण केवल सत्ताका लागि होइन, जनताको आशा, आकांक्षा र क्रान्तिका सपनाहरूमाथि भइरहेका प्रहारहरूविरुद्ध बनेको हो’, उनले भने, ‘तर, यस समीकरणले उठाएका महत्वपूर्ण विषयहरूमध्ये एक — संविधान संशोधनको मुद्दा — अहिले कहाँ पुगेको छ ? त्यसलाई अब फेरि अघि सारेर टुंगोमा पुर्‍याउनुपर्छ।’

बास्कोटाले सरकार र राजनीतिक दलहरूले अहिले देखिएको निराशालाई लिएर आत्मसमीक्षा र सुधार गर्नुपर्ने आवश्यकता औँल्याएका छन् ।

उनले कांग्रेस र एमाले दुवैले समीक्षा गर्नुपर्ने कुरामा जोड दिएका छन् । ‘हामीले आफूलाई पनि समीक्षा गर्नुपर्छ। सुधार गर्नुपर्ने ठाउँमा सुधार गर्न तयार हुनुपर्छ। हामी सुधारको बाटोमा हिँड्न सक्नुपर्छ।’

उनले अहिलेको सत्ता समीकरणले जनताका समस्याको हल गर्नुपर्ने पनि बताए । सरकारले बोकेको जिम्मेवारीबारे आत्मसमीक्षासहित नयाँ प्रतिबद्धता र सुधारमार्फत् अघि बढ्नुपर्ने समय आएको पनि उनले बताए ।