काठमाडौं – आगामी दशैँको फूलपाती अर्थात् असोज १३ बाट प्रदर्शनमा आउन लागेको फिल्म ‘बलिदान’ को थप चार पोस्टर सार्वजनिक भएको छ ।

निर्माण पक्षले बुधबार नायक अर्पण थापा, नायिका ऋचा शर्मा, अभिनेता हेमन्त बूढाथोकी र निर्देशकसमेत रहेका सन्तोष सेनको चरित्र खुल्ने चार पोस्टर सार्वजनिक गरेको हो ।

उक्त पोस्टरले सेनको पनि फिल्म अभिनय रहेको खुलाएको छ । पोस्टरमा उनको भूमिका रहस्यमयी देखिन्छ । उनको टाउकामा मानव खप्परको माला छ ।

लामो जट्टा र क्रोधित मुद्रामा उनलाई देख्न सकिन्छ । उनी खलपात्रको भूमिकामा रहेको पोस्टरले संकेत गर्छ । यद्यपि निर्माण पक्षले सेनको भूमिकाबारे खुलाएको छैन ।

सेनले आफू प्रभावशाली भूमिकामा रहेको सामाजिक सञ्जलमार्फत् जानकारी गराएका छन् । उनले लेखेका छन्, ‘एक यस्तो पात्र, जो केवल कथाभित्र सीमित छ । उसले आफ्नो समाजलाई परिभाषित गरेको छ ।’

त्यस्तै पोस्टरमा नायिका ऋचा शर्मा अधबैंसे महिलाको चरित्रमा देख्न सकिन्छ । अर्पण थापा भने जेन्टलम्यान लुक्समा छन् । हेमन्त बूढाथोकी लामो दाह्री र तालुमा कपाल नभएको वृद्धको भूमिका छन् । झट्ट हेर्दा उनी भारतीय फिल्म ‘बाहुबली’ का पात्र ‘कटप्पा’ जस्तो देखिन्छन् । उनी क्रोधित मुद्रामा छन् ।

यसअघि नायकद्वय समीर भट्ट, सौगात मल्ल र नायिका कविता रायको क्यारेक्टर पोस्टरमा सार्वजनिक गरिएको थियो । ‘आसुसेन फिल्म्स् प्रालि’ को प्रस्तुतिमा बनेको फिल्मका निर्माता पवन ब्राडफोर्ड बिस्ट हुन् ।

यो फिल्मसँगै ‘माइतीघर’ र ‘हरिबहादुरको जुत्ता’ एक साथ प्रदर्शनमा आउँदैछन् ।