काठमाडौं– नेपाली कांग्रेसका नेता प्रकाशमान सिंहले प्राप्त उपलब्धि र अधिकार रक्षाका लागि कांग्रेस पार्टीलाई व्यवस्थित बनाउनुपर्नेमा जाेड दिएका छन् । 

नेपाली कांग्रेसकाे जारी केन्द्रीय समिति बैठकमा आइतबार आफ्नो धारणा राख्ने क्रममा उनले कांग्रेसकाे संगठनलाई बलियो बनाए मात्रै हालसम्मका संघर्षबाट प्राप्त उपलब्धि र अधिकार संस्थागत हुने बताए । 

`पार्टीको संगठन राम्रो बनाउनेमा लाग्नुपर्छ । कांग्रेस वेल मेनेज भयाे भने प्राप्त उपलब्धिहरू, अधिकारहरू बिस्तारै संस्थागत हुन्छन् । 
एकले अर्कोको दोष देख्ने प्रवृत्तिले संगठन बलियो हुँदैन,´ कांग्रेस पूर्वमहामन्त्रीसमेत रहेका सिंहले भने । 

त्यस्तै उनले कांग्रेसकाे मूल नीतिमा रहेर समयअनुसार पार्टीको रणनीति बनाउनुपर्ने पनि धारणा राखे । कांग्रेस नेता सिंहले पार्टीको महाधिवेशनको मिति नजिक आइसकेको भन्दै महाधिवेशनका लागि आवश्यक जे प्रक्रियाहरू छन्  ती छिटै  पूरा गर्नुपर्ने बताए  । 

त्यस्तै बैठकमा कांग्रेसका तर्फबाट नेतृत्व गरेर सरकारमा रहेका, उपप्रधानमन्त्री एवम् शहरी विकास मन्त्री समेत रहेका सिंहले सरकारको कामकारबाही, बजेटलगायतका विषयमा पनि प्रस्ट पारेका थिए । 

सो क्रममा उनले सरकारमा रहेर चाहनाअनुसार काम गरिरहेको भन्दै आफूले सम्हालेको मन्त्रालयबाट भएका नीतिगत र विकासका कामको फेहरिस्त प्रस्तुत गरेका थिए ।