इजरायल – इजरायलले एकै दिन यमन, लेबनान, सिरिया र गाजामा हवाई आक्रमण गरेको छ। गाजामा गरेको आक्रमणबाट ५४ जनाको ज्यान गएको छ।

गाजाको स्वास्थ्य मन्त्रालयले दिएको जानकारी अनुसार त्यहाँको अस्पतालको अवस्था एकदमै खराब छ। ४८ घण्टामा नै सो अस्पताल ध्वस्त हुन सक्ने छ। अहिले उपचार गराइरहेका हजारौँ जनाको जीवन समेत खतरामा परेको छ।

गाजामा युद्ध जारी भइरहेको समयमा अमेरिकी राष्ट्रपति डोनाल्ड ट्रम्प अरबको भ्रमण गर्दै छन्। सोही समयमा व्यापारिक साझेदारी र सम्झौता हुने अनुमान गरिएको छ। हाउथीले इजरायलको राजधानीमा लक्षित गर्दै मिसाइल प्रहार गरेपछि इजरायलले यमनमा आक्रमण गरेको हो। इजरायलले लेबनानको बेका उपत्यकामा आक्रमण गर्दै सिरिया अधीनस्थ गोलान हाइटको बङ्कर नास गरेको जनाएको छ।

त्यहाँको रेडक्रस सोसाइटीले गाजाले अझ ठुलो सङ्कटको सामना गर्नुपर्ने अवस्था आएको जनाएको छ। रेडक्रसले पछिल्लो १९ महिनामा अहिलेको संकट सबै भन्दा भयावह भनेको छ। मानिसको विस्थापन, भोकमरी, रोग र कुपोषण अहिले त्यहाँ सामान्य बनेको छ।