दोलखा– नेपाली कांग्रेसका नेता स्व.भीमबहादुर तामाङको १३औँ स्मृति दिवसको अवसर पारेर आउँदो चैत १३ गतेदेखि जिल्लामै सर्वाधिक धनराशिको बागमती प्रदेश स्तरीय भलिबल प्रतियोगिता दोलखाको वैतेश्वर-३ मिर्गे लहरेमाने चोकमा हुने भएको छ ।

प्रतियोगिता नेपाली कांग्रेस दोलखा प्रदेश कार्यसमिति ‘क’ले आयोजना गर्न लागेको हो ।

समितिले एक सूचना मार्फत आउँदो चैत १३ गते राष्ट्रियस्तरका ख्यातिप्राप्त कलाकारहरूको उपस्थितिमा वृहत् सांस्कृतिक कार्यक्रमका बिच उद्घाटन गरिने कांग्रेस दोलखा प्रदेश क्षेत्र नम्बर ‘क’का सभापति शुक्रराज तामाङले जानकारी दिए ।

‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ भलिबल प्रतियोगिता आयोजना गर्न लागिएको हो । प्रतियोगिता अवधिभर विभिन्न सांस्कृतिक कार्यक्रमसमेत हुने तामाङले जानकारी दिए । प्रतियोगिता चैत १६ गते सम्पन्न हुनेछ ।

प्रतियोगितामा भलिबल तर्फ प्रथम,दोस्रो,तेस्रो र सान्त्वना पुरस्कार क्रमशः चार लाख, दुई लाख, एक लाख र पचास हजार राखिएको छ । खेलको उद्घाटन नेपाली कांग्रेसका केन्द्रीय नेतृत्वको टोलीले गर्ने खेल आयोजक समितिले जनाएको छ।
सुबास बस्नेत