काठमाडौं – नेकपा एमालेका सांसद बसन्तकुमार नेम्बाङ एक वर्ष पछाडि आज प्रतिनिधिसभामा उपस्थित भएका छन्।

गत साल माघ १७ गते ब्रेन स्ट्रोक भए पश्चात आज पहिलो पटक सदन गएको उनकी श्रीमती भूमिका सुब्बाले जानकारी दिइन् ।

नेम्बाङलाई ताप्लेजुङको एक कार्यक्रममा सहभागी हुने क्रममा स्वास्थ्यमा एक्कासी समस्या देखिएको थियो। त्यसपछि काठमाडौं ल्याएर उपचार गराउँदा उनलाई ब्रेन स्ट्रोक देखिएको थियो ।

नेम्बाङबारे श्रीमती सुब्बाले फेसबुकमा लेखेकी छ्न, ‘जानुहुँदा अनुहार मलीन देखीए पनि सदनबाट फर्कीनु हुँदा असाध्यै खुशी हुनुहुन्थ्यो । उहाँको मनोबल उच्च राख्न र स्वास्थ सुधार गर्न पनि अब पहिलाको गतिविधिहरूलाई विस्तारै निरन्तरता दिनुपर्छ भन्ने महसुस भएकोछ ।’

अहिले नेम्बाङ सुन्न सक्ने भएपनि बोल्न नसक्ने श्रीमती सुब्बाको भनाइ छ। नेम्बाङ २०७४ र ७९ को निर्वाचनमा पाँचथरबाट विजयी भएका सांसद हुन् । यस अगाडि उनी भौतिक पूर्वाधारमन्त्री सहरी विकासमन्त्री समेत भइसकेका छन्।