काठमाडौं– नेपाली कांग्रेसको भ्रातृ संगठन नेपाल विद्यार्थी संघ (नेविसंघ)ले जलवायु न्यायसम्बन्धी गोष्ठी  सम्पन्न गरेको छ । नेविसंघले बिहीबार सोलुखुम्बुको स्यानबोचेमा गोष्ठी सम्पन्न गरेको हो । 

‘जय नेपाल टी–ट्वान्टी अन्तर्राष्ट्रिय अन्तर–विश्वविद्यालय क्रिकेट प्रतियोगिता सफलतापूर्वक सम्पन्न भएपछि नेविसंघले ‘वान अर्थ, वान भ्वाइस : एक्ट वन क्लाइमेट चेन्ज’को उद्देश्यले गोष्ठीको आयोजना गरेको प्रवक्ता सुरज सेजुवालले जानकारी दिए । 

गोष्ठीमा जय नेपाल क्रिकेट प्रतियोगिताको विजेता टोली मध्यपश्चिम विश्वविद्यालय, सगरमाथा राष्ट्रिय निकुञ्जका प्रतिनिधि, हिमालयन ट्रेकर्स नेपालका प्रतिनिधि, स्थानीयबासी, ट्रेकरहरू, नेविसंघका सदस्यहरू तथा जलवायु अभियन्ताहरूको सहभागिता रहेको थियो ।

वल्ड्र्स युथ फर क्लाइमेट जस्टिसकी राष्ट्रिय अभियानकर्ता सुस्मिता क्षेत्रीले सञ्चालन गरेको गोष्ठीको सन्देश ‘हिउँ पग्लिनु अघि नै कारबाही गरौँ’ भन्ने रहेको नेविसंघले जनाएको छ ।

गोष्ठीमा नेविसंघका अध्यक्ष दुजाङ शेर्पा, सगरमाथा राष्ट्रिय निकुञ्जका संरक्षण अधिकृत विवेक बैजू, हिमालयन ट्रेकर्स नेपालका प्रतिनिधि नवा छिरिङ शेर्पा, होटल एभरेस्ट भ्युका मालिक आङ शेर्पा र मध्यपश्चिम विश्वविद्यालयका सहायक प्राध्यापक विक्रम खड्काले आ–आफ्नो धारणा राखेका थिए । 

गोष्ठीका सहभागीहरूले ‘जलवायु न्याय’ लेखिएको ब्यानरमा हस्ताक्षर क्रिकेट प्रतियोगितामा भएका जम्मा रन संख्या बराबर वृक्षारोपण गरेको प्रवक्ता सेजुवालले जानकारी दिए ।