काठमाडौं – क्यानडाका प्रधानमन्त्री जस्टिन ट्रुडोले राजीनामा दिएका छन् । आफ्नो लिबरल पार्टीभित्र बढ्दो असहमतिका कारण उनले राजीनामा घोषणा गरेको अन्तराष्ट्रिय समाचार संस्थाहरुले उल्लेख गरेका छन् ।

अतिरिक्त महसुल बढाउने भनेर अमेरिकाका नवनिर्वाचित राष्ट्रपति डोनाल्ड ट्रम्पले दिएको चेतावनीपछि उत्पन्न विश्वासको सङ्कट र अर्थमन्त्री क्रिष्टिष फ्रिल्यान्डको राजीनामापछि उनीमाथि राजीनामाको दबाब बढेको थियो ।

ट्रुडोले राजीनामा दिएपछि उनी तत्कालै प्रधानमन्त्री पद छोड्ने वा नयाँ लिबरल नेताको चयनसम्म पदमा रहने भन्ने कुरा अझै स्पष्ट भएको छैन । उनले २०१३ देखि लिबरल पार्टीको नेतृत्व गर्दै आएका छन् र उनी २०१५ देखि क्यानाडाको प्रधानमन्त्रीका रूपमा कार्यरत थिए ।

पछिल्लो समयमा गरिएको जनमत सर्वेक्षणहरूमा उनको पक्षमा कमजोर नतिजा देखिएपछि उनी दबाबमा परेका थिए । डिसेम्बर महिनामा ट्रुडोका अर्थमन्त्रीले नीतिगत मतभेदका कारण राजीनामा दिएपछि प्रधानमन्त्रीमाथिको दबाब झनै बढेको थियो ।

क्यानाडामा आगामी अक्टोबरसम्म चुनाव सम्पन्न गरिनुपर्ने संवैधानिक प्रावधान छ । तर, जनमत सर्वेक्षणहरूमा ट्रुडो नेतृत्वको लिबरल पार्टीको लोकप्रियता घट्दै गइरहेको र विपक्षी कन्जरभेटिभ पार्टीले ठूलो जीत हासिल गर्ने संभावना देखिएको छ ।