झापा- घरमा सहयोगी राखिएकी १६ वर्षीया किशोरीलाई बलात्कार गरेको आरोपमा पक्राउ परेका बिर्तामोड नगरपालिकाका पूर्व प्रमुख ध्रुवकुमार शिवाकोटी सोमबार जेल चलान भएका छन् ।

झापा जिल्ला अदालतमा सोमबार भएको थुनछेक बहसपछि शिवाकोटीलाई पुर्पक्षका लागि थुनामा पठाउने आदेश आएको हो ।

न्यायाधीश नवीनकुमार जोशीको इजलासले शिवाकोटीलाई थुनामा राखेर पुर्पक्ष गर्न आदेश दिएको अदालतका श्रेस्तेदार किरणकुमार सिंहले बताएका छन् ।

आदेशका क्रममा न्यायाधीश जोशीले बिरामी रहेका शिवाकोटीलाई उपचार व्यवस्था गर्न पनि जिल्ला कारागार कार्यालय झापालाई आदेश दिएको छ। आइतबार बयान सकिएसँगै शिवाकोटीको मुद्दामा सोमबार आदेश आएको हो ।

घरमा कामदारका रुपमा राखिएकी किशोरीलाई बलात्कार गरेको आरोपमा शिवाकोटीलाई प्रहरीले गत मंसिर २४ गते बिर्तामोड नगरपालिका-५ स्थित घरबाटै पक्राउ गरेको थियो ।

पक्राउ परेदेखि नै शिवाकोटी हिरासतमा नबसी बीएण्डसी अस्पतालमा भर्ना भएका थिए ।

पटक पटक बलात्कार गरिएपछि ती किशोरी बिर्तामोड-५ स्थित शिवाकोटीको घरबाट भागेर काँकडभिट्टा पुगेकी थिइन् । किशोरीलाई काकडभिट्टाबाट उद्धार गरिएपछि शिवाकोटीलाई प्रहरीले घरबाटै पक्राउ गरेको थियो।