काठमाडौं– पाकिस्तानको खैबर पख्तुनख्वा प्रान्तमा विगत १० वर्षदेखि पूर्वप्रधानमन्त्री इमरान खानले स्थापना गरेको पाकिस्तान तहरिक ए इन्साफ पार्टीले सरकार चलाइरहेको छ । तैपनि उक्त प्रान्तले लामो समयदेखि स्वास्थ्य संकटको सामना गरिरहेको छ ।

अघिल्लो वर्षजस्तै सन् २०२४ मा पनि प्रान्तीय सरकारले स्वास्थ्य क्षेत्रमा संकटको घोषणा गरेको थियो । तर अझै पनि त्यहाँका बासिन्दा गुणस्तरीय स्वास्थ्य सेवाबाट भने वञ्चित छन् ।

सरकारले स्वास्थ्य क्षेत्रलाई प्राथमिकतामा राखेको दाबी गरेको भए पनि नतिजा भने सकारात्मक देखिएको छैन । सरकारले स्वास्थ्य क्षेत्रका लागि २ खर्ब ३२ अर्ब पाकिस्तानी रुपैयाँ बजेट विनियोजन गरेको थियो । त्यसमध्ये ३५ अर्ब ७६ करोड रुपैयाँ विकासका परियोजनाका लागि विनियोजन गरिएको थियो ।

विनियोजित कुल बजेटमध्ये केबल १५ प्रतिशत अर्थात् ५ अर्ब २९ करोड रुपैयाँ मात्रै खर्च भएको छ । यति हुँदा हुँदै पनि सरकारले अघिल्लो वर्षको १२ अर्ब रुपैयाँ तिर्न बाँकी नै छ ।