काठमाडौं – प्रियंका कार्कीको अभिनय रहेको फिल्म ‘ममी’ प्रदर्शनको संघारमा छ । माघ २५ देखि प्रदर्शनमा आउने यस हरर जनराको फिल्मको केन्द्रीय पात्रमा उनी छन् ।

प्रियंकाको यो पहिलो हरर फिल्म होइन । उनले ‘ची मुसी ची’ र ‘माला’ जस्ता हरर फिल्ममा अभिनय गरेकी छन् । उनले एक हरर सर्ट फिल्म ‘किचकंडी’मा पनि अभिनय गरेकी छन् ।

प्रियंका आफ्ना हरर फिल्म प्रति खासै सन्तुष्टि रहिनछिन् । आफ्ना हरर फिल्म हेर्दा आफैँलाई डर नलागेको घटना पनि उनीसँग रहेछन् ।

आफ्ना हरर फिल्मबारे प्रियंका आफैँ भन्छिन्, ‘मैले धेरै हरर फिल्ममा अभिनय गरेँ । अनि ती फिल्म हलमा हेर्दा मलाई नै डर लाग्दैन थियो ।’

कमलादीमा सोमबार आयोजित ‘ममी’को गीत सार्वजनिक कार्यक्रममा प्रियंकाले आफ्ना हरर फिल्मबाट दर्शक नतर्सिएको भन्दै आत्मआलोचना गरिन् । जसले आफ्नो प्रतिष्ठा नै खराब हुन लागेको महसुस भएको उनले खुलाइन् ।

भनिन्, ‘हरर फिल्म दर्शकलाई डर पैदा गर्नसक्नुपर्छ । मैले हरर फिल्म खेल्ने तर दर्शक नै नतर्सिने । मेरो प्रतिष्ठा नै खराब हुन लागिसक्यो ।’ यद्यपि उनी आफ्नो उत्कृष्ट हरर फिल्म ‘माला’ मान्छिन् ।

कलाकारको रुपमा आफूले शतप्रतिशत दिँदा पनि ती फिल्म सफल नभएको उनको तर्क छ । भन्छिन्, ‘प्रायः फिल्महरूको स्क्रिप्ट एकदमै राम्रो हुन्छ । फ्लोरमा गएपछि चिप्लिने हो । स्क्रिप्टको ३० प्रतिशत पनि पर्दामा उत्रदैन । बजेटका कारण छायाङ्कनमा सम्झौता, ब्याकग्राउन्डमा साउन्ड र भीएफएक्सका हामी चुक्दा फिल्म बिग्रिएको मलाई महसुस भएको छ ।’

यीनै कुरालाई आफूलाई हरर फिल्मप्रति ‘ट्रमा’ हुने प्रियंकाले सुनाइन् ।

उनले अगाडि भनिन्, ‘यिनै कुराले मलाई दर्शक तर्सिने खालको हरर फिल्म खेल्नुपर्छ भन्ने लागेको थियो ।’

‘ममी’ फिल्ममा आफ्ना विगतको फिल्मको कमजोरी नदोहोर्‍याउन निर्देशक सरम निरौलालाई झक्झक्याएको समेत प्रियंकाले सुनाइन् । भनिन्, ‘मैले समरलाई राउन्ड र भीएफएक्समा राम्रो हुनुपर्छ है भनेर भनिरहेकै छु ।’

डराउनुपर्ने दृश्यमा दर्शक नहाँसुन् भनेर समेत निर्देशकलाई सजग गराएको समेत उनले सुनाइन् ।