काठमाडौं– गत सातादेखि शुक्रराज ट्रपिकल तथा सरुवा रोग अस्पतालमा उपचाररत एमपक्स संक्रमितको स्वास्थ्यमा सुधार भइरहेको अस्पतालले जनाएको छ ।

उनको घाउ निको हुँदै गएको अस्पतालका एमपक्स सम्पर्क चिकित्सक डा.शिवेन्द्र झाले बताए । ४४ वर्षीय संक्रमित गत शनिबार साउदी अरबबाट नेपाल आएका थिए । घाउसहित घर प्रवेश गरेका उनी भोलिपल्टै उपचारका लागि अस्पताल पुगेका थिए । परीक्षण गर्दा उनमा एमपक्स संक्रमण पुष्टि भएको थियो । 

चिकित्सकका अनुसार आइसोलेसनमा राखेर उनको उपचार भइरहेको छ । उनलाई थप १० दिनपछि मात्र डिस्चार्ज गर्न मिल्ने डा. झाले बताए ।

सिन्धुली स्थायी घर भई काठमाडौं स्वयम्भुमा डेरा गरी बस्ने उनि अस्पतालका तेस्रा एमपक्स संक्रमित हुन् । दुई साताअघि साउदीबाटै नेपाल आएका साउदीकै ३६ वर्षीय युवा निको भई डिस्चार्ज भइसकेका छन् । 

त्यस्तै गत असारमा ६० वर्षीय विदेशी पर्यटकमा पनि एमपक्स पुष्टि भएको थियो ।