काठमाडौँ- नेपाली कांग्रेसका महामन्त्री गगनकुमार थापाले आफूहरुले पार्टीको महाधिवेशन तत्काल माग गर्नुको कारणबारे स्पष्टीकरण दिएका छन्। सामाजिक सञ्जाल फेसबुकमार्फत थापाले अधिवेशन कहिले गर्ने, नेतृत्व फेर्ने मात्रै नभई देशप्रतिको चिन्ताको विषय जोडेर अधिवेशनको विषय प्रवेश गराएको बताएका हुन्।

‘अधिवेशनको विषय देशप्रतिको चिन्ताको विषय जोडेर हामीले प्रवेश गराएका हौँ। भदौ २३ र २४ गते जेनजीमात्रै होइन सबै उमेर समूहका मानिसहरुले भ््रष्टाचार, नातावाद, कृपावादविरुद्ध व्यापकरुपमा असन्तुष्टि जाहेर गरेको होइन? असन्तुष्टि मात्रै होइन त्यसको कारण तिमी पनि हौ। नेपाली कांग्रेस पनि हो भनेर हामीमाथि नै प्रश्न उठाएको होइन?’ उनले पार्टीको महाधिवेशन तत्काल गर्न नहुने भन्ने पक्ष्का नेताहरुलाई सोधे।

देशमा पहिलोपटक कांग्रेसका नेतृत्वमा मात्रै नभई कांग्रेसकै विरुद्ध पनि आन्दोलन भएको प्रति चिन्ता व्यक्त गरे। ‘पहिलोपटक नेपाली कांग्रेसको नेतृत्वमा आन्दोलन नभएको मात्रै होइन, हामीविरुद्ध भयो। के हामी यो कुरा बिर्सेर अघि बढ्न सक्छौँ? हामी सत्ता पक्ष थियौँ। पहिलो पार्टी थियौँ। आज हामी न पहिलो पार्टी न सत्तापक्ष छौँ। सडकमा आइपुगेका छौँ। अब पनि हामी समीक्षा नगर्ने?,’ उनले भने, ‘यसको आधारमा हामी यो यो ठाउँमा चुक्यौँ, अब चुक्दैनौँ भन्नुपर्दैन। अनि हामी अधिवेशन नगरी यसरी जान सक्छौँ।’

थापाले पार्टीको अधिवेशनको बहसमा पार्टीका सबै नेता कार्यकर्तालाई सक्रिय सहभागिताका लागि पनि आग्रह गरेका छन्।