काठमाडौं- नेकपा (माओवादी केन्द्र) का युवा नेता लेखनाथ न्यौपानेले बुधबार घोषणा गरिएको दस दलबीचको एकता लामो समय टिक्ने सम्भावना नभएको टिप्पणी गरेका छन्।

बुधबार माओवादी केन्द्रको नेतृत्वमा ‘नेपाली कम्युनिस्ट पार्टी’ नामक नयाँ एकीकृत पार्टीको घोषणा भएको सन्दर्भमा उनले यस्तो टिप्पणी गरेका हुन् ।

उक्त एकता कार्यक्रममा सहभागी नभएर घरमै बसेका न्यौपानेले सामाजिक सञ्जालमार्फत माओवादी र एकीकृत समाजवादी पार्टीको कदमप्रति तिखो व्यंग्य गरेका छन्।

उनले लेखेका छन्, ‘ओछ्यानमा बसेर भिडियो हेरेपछि… पिँध नभाका लोटा, अनुहार कुचिएका, पानीका लौरा, पिङ खेल्दा खेल्दा थाकेका, गन्हाएका नाम मञ्चमा’, उनले भनेका छन्, ‘यसो हेरेको सबै दानेगाई जस्ता, फुकाएपछि आआफ्नै बाटो लाग्ने, फागुन २१ सम्म रहे ठूलो कुरो ।’

उनले नहुनुभन्दा जस्तो भए पनि मामा नै हो भनेर चित्त बुझाउने मेलो नेताहरूले गरेको उल्लेख गरेका छन् । ‘एउटा नयाँ कुरा टाई लगाउन बिर्सेका रहेछन् मान्छेहरूले आज’, उनले भनेका छन् ।

उनको यो टिप्पणी माओवादी नेतृत्वमा भएको नयाँ एकतालाई लक्षित गर्दै व्यंग्यका रूपमा आएको छ । न्यौपानेले अघिल्ला एकता प्रयासहरू पनि असफल भएको स्मरण गराउँदै अहिलेको एकतालाई पनि टिकाउ नहुने दाबी गरेका छन्।