काठमाडौं- बहुविवाहको मुद्दामा मंगलबार अपरान्ह पक्राउ परेका नेकपा एमालेका केन्द्रीय सदस्य पासाङ शेर्पा कारागार चलान भएका छन्।

जिल्ला अदालत र उच्च अदालतबाट समेत एक वर्षअघि नै दोषी ठहर भएका शेर्पालाई जिल्ला प्रहरी परिसर काठमाडौंको टोलीले मंगलबार पक्राउ गरेको थियो।

उनलाई बुधबार अदालतमा उपस्थित गराएर तोकिएको सजाय भुक्तानका लागि डिल्लीबजार कारागार चलान गरिएको काठमाडौं प्रहरी परिसरका प्रवक्ता एवम् एसपी पवनकुमार भट्टराईले बताए।

शेर्पा ताप्लेजुङका हुन् । उनी पछिल्लो समय भक्तपुरको गुन्डुमा रहेर अध्यक्ष केपी शर्मा ओलीको सुरक्षामा खटिएका थिए । शेर्पा एमालेको जनसंगठन जनजाति महासंघका अध्यक्ष पनि थिए ।

बहुविवाहको मुद्दा परेपछि उनलाई २०७९ मा जिल्ला अदालतले एक वर्ष कैद र ५ हजार रुपैयाँ जरिवाना तोकेको थियो। त्यसविरुद्ध शेर्पा उच्च अदालत पाटन पुगेका थिए ।

त्यहाँ पनि शेर्पाको मुद्दामा जिल्लाकै फैसला सदर भएको थियो । तर उनी शक्तिको आडमा बाहिरै रहेको अवस्थामा अब जेल गएको हुन् ।