काठमाडौं– मलेसियाविरुद्धको महिला टी–ट्वेन्टी अन्तर्राष्ट्रिय शृङ्खलाको तेस्रो खेलमा नेपाल पराजित भएको छ ।

मलेसियाको क्वालालम्पुरमा आज भएको खेलमा नेपाल मलेलियासँग १३ रनले पराजित भएको हो । योसँगै पाँच खेलको शृङ्खलामा मलेसियाले नेपालसँग २–१ को अग्रता बनाएको छ ।

मलेसियाले जितको लागि दिएको १२१ रनको लक्ष्य पछ्याएको नेपाल निर्धारित २० ओभरमा ८ विकेट गुमाउँदै १०७ रनमा समेटियो ।

नेपालका लागि रुबी पोद्धारले सर्वाधिक ३१ रनको योगदान दिइन् । यसैगरी, कप्तान इन्दु बर्मा २२, सम्झना खड्का १८ तथा कविता कुँवरले १५ रन बनाइन् । मलेसियाका नुर दानिया र आइस्या इलिसाले एक–एक विकेट लिए ।

यसअघि पहिले ब्याटिङ गरेको मलेसियाले निर्धारित २० ओभरमा ४ विकेटको क्षतिमा १२० रन बनाएको थियो । ओपनर आइना हमिजाले ६१ रनको अर्धशतक पारी खेलिन् । यस्तै, मास इल्साले ३० तथा वेन जुलियाले १६ रन जोडिन् । नेपालकी कविता कुँवर र कविता जोशीले समान २–२ विकेट लिए ।

पहिलो खेलमा नेपाल मलेसियासँग तीन रनले पराजित भएको थियो भने दोस्रो खेलमा ६ विकेटको जित निकालेको थियो । शृङ्खला आफ्नो पक्षमा पार्न नेपाललाई अबका बाँकी दुवै खेल जित्नुपर्नेछ ।