काठमाडौं– पाकिस्तानको रावलपिण्डीस्थित आदियाला कारागारमा एचआईभी सङ्क्रमितको सङ्ख्या उच्च रहेको पाइएको छ । उसैपनि अत्यधिक भीडभाड रहेको यस कारागारमा १ सय ४८ जना एचआईभी सङ्क्रमित बन्दी छन् ।

यो पञ्जाब प्रान्तका कारागारमा भेटिएका सबैभन्दा धेरै एचआईभी सङ्क्रमितको सङ्ख्या हो । पञ्जाब एड्स नियन्त्रण कार्यक्रमको तथ्याङ्कमा यस्तो पाइएको हो ।

२ हजारभन्दा कम क्षमता रहेको यस कारागारमा हाल ४ हजार ३ सयभन्दा धेरै बन्दी राखिएको छ । पाकिस्तानबाट प्रकाशित हुने डन अखबारका अनुसार यस प्रकोपलाई कारागारभित्र स्वास्थ्य सेवामा लापरवाहीको परिणामका रुपमा अथ्र्याएको छ ।

पाकिस्तानमा असुरक्षित यौन सम्पर्क, सङ्क्रमित रक्तदान, निर्मलीकरण नगरिएका सिरिन्जको प्रयोगजस्ता अभ्यासका कारण पाकिस्तानमा एचआईभीको सङ्क्रमण बढ्दै गएको जनाइएको छ । सन् २०१९ मा पाकिस्तानको राटो डेरो क्षेत्रमा एक जना चिकित्सकले असुरक्षित सिरिन्ज प्रयोग गर्दा सयौँ बालबालिका एचआईभीबाट सङ्क्रमित भएको घटना सार्वजनिक भएको थियो ।

त्यसैगरी, पाकिस्तानमा सिरिन्जबाट लागूऔषध लिने ४० प्रतिशत दुव्र्यसनी एचआईभी पोजेटिभ छन् । यस्तै अभ्यासका कारण कारागारसम्म एचआईभीको सङ्क्रमण फैलिएको विश्लेषण गरिएको छ ।