काठमाडौं– अमेरिकासँगको सैन्य अभ्यासमा सहभागी हुने भारतीय सेनाको टोली प्रस्थान गरेको छ । २१ औँ संस्करणको संयुक्त अभ्यासमा सहभागी हुनका लागि भारतीय सेनाको टोली अमेरिका पुगेको हो ।

‘युद्ध अभ्यास २०३५’ नाम दिइएको अभ्यास सेप्टेम्बर १ देखि शुरु भएर सेप्टेम्बर १४ सम्म सञ्चालन हुनेछ । भारतीय आर्थिक अखबार इकोनोमिक टाइम्सका अनुसार यो अभ्यास अमेरिकाको अलास्का राज्यस्थित फोर्ट वेइनराइटमा सञ्चालन हुने छ ।

भारतको रक्षा मन्त्रालयले दिएको जानकारीअनुसार यस अभ्यासमा भारतका तर्फबाट मद्रास रेजिमेन्टको बटालियनले सहभागिता जनाउनेछ । अमेरिकाका तर्फबाट भने अभ्यासमा पहिलो बटालियन, पाचौँ इन्फान्ट्री रेजिमेन्ट ‘बबक्याट’ उल्भ्स ब्रिगेड कम्ब्याट टिम, एघारौँ एरअबोर्न डिभिजनको सहभागिता रहनेछ ।

मन्त्रालयका अनुसार दुई साताको अवधिमा सैनिकहरुले विभिन्न सामरिक प्रशिक्षण लिनेछन् । यसमा हेलिबोर्न कारवाही, निगरानी सुविधा र चालकरहित हवाइ प्रणालीको परिचालनबारे अभ्यास समावेश छन् ।

त्यसैगरी, अभ्यासमा सैनिकहरुले ‘रक क्राफ्ट’, पहाडी युद्धकला, हताहती उद्धार, सैन्य चिकित्सा सहायता र तोपखाना, हवाई र विद्युतीय युद्धकार्य प्रणालीको संयुक्त प्रयोगबारे पनि प्रशिक्षण लिने जनाइएको छ ।