काठमाडौं– तिहार पनि यो फूलपातीमा जस्तै फिल्महरूको भिडन्त देखिने भएको छ । तीन फिल्मले तिहारमा बक्स अफिस भिडन्त गर्ने भएका छन् ।

कात्तिक ६ गते बिहीबार भाइटीकाको दिन फिल्म ‘सोल्टिनी’ र ‘वरिष्ठ बलराम’ले प्रदर्शन मिति तोकेका छन् । कात्तिक ७ गते शुक्रबारका लागि अर्को फिल्म ‘मैझारो’ले प्रदर्शन मिति तोकेको हो ।

अर्थात्, कात्तिकको पहिलो साता पनि तीन फिल्म प्रदर्शनमा आउने भएका छन् ।

रोचक कुरा– यो बक्स अफिस प्रतिस्पर्धामा भने नायक दयाहाङ राईका दुई फिल्म छन् । उनी फिल्म ‘वरिष्ठ बलराम’ र ‘मझौरो’को शीर्ष कलाकार रहेको बताइएको छ ।

‘सोल्टिनी’ले पाएन सुख

असोज ३ बाट भागेर ‘सोल्टिनी’ भाइटीकामा पुगेको हो । असोज ३ मा ‘जारी २’ प्रतिस्पर्धा गर्न आएपछि यो फिल्मको प्रदर्शन मिति हेरफेर भएको थियो ।

‘सोल्टिनी’मा गायक तथा नायक प्रकाश सपुत र नायिका परीक्षा लिम्बू शीर्ष भूमिकामा छन् । निर्देशक अर्जुन सुबेदी हुन् ।

उपेन्द्र सुब्बाको लेखन र निर्देशन रहेको ‘जारी २’को शीर्ष कलाकार नायक दयाहाङ राई र मिरुना मगर हुन् ।

प्रदर्शन मिति हेरफेर गरे पनि ‘सोल्टिनी’को प्रतिस्पर्धा दयाहाङ र मिरुना स्टारर फिल्मसँगै हुने पक्का भएको छ । अर्थात्, भाग्दा पनि दयाहाङ र मिरुनासँग ‘सोल्टिनी’ जोगिन सकेन ।

कात्तिक ६ मा झन् ‘सोल्टिनी’ले दयाहाङ स्टारर दुई फिल्मसँग प्रतिस्पर्धा गर्नु पर्ने देखिएको छ । अर्थात्, ‘जारी २’सँग भागेको ‘सोल्टिनी’ले फिल्महरु ‘वरिष्ठ बलराम’ र ‘मैझारो’सँग प्रतिस्पर्धा गर्नुपर्ने देखिएको छ ।

‘वरिष्ठ बलराम’ मा दयाहाङ र नायक विजय बराल शीर्ष भूमिकामा छन् ।

तर, यो मितिमा ‘सोल्टिनी’लाई केही राहत भने छ । यी दुई ‘जारी २’ जस्तो हिट फिल्मको शृङ्खला होइनन् ।