काठमाडौं- पाकिस्तानमा जुलाई महिनामा मुद्रास्फीति दर ४.१ प्रतिशत पुगेको छ । यो गत डिसेम्बरयताकै उच्च हो ।

पाकिस्तान तथ्याङ्क ब्यूरोका अनुसार यो वृद्धि मुख्य रूपमा खाद्य वस्तु र ऊर्जा शुल्कमा वृद्धि भएपछि देखिएको हो । पाकिस्तानबाट प्रकाशित हुने द एक्सप्रेस ट्रिब्युनका अनुसार मासिक हिसाबमा यो २.९ प्रतिशतले धेरै हो ।

कठोर मौद्रिक नीतिले आर्थिक अवस्थालाई थप जटिल बनाएको विश्लेषकहरु बताउँछन् । हाल पाकिस्तानमा नीतिगत ब्याजदर ११ प्रतिशत रहेको छ । पाकिस्तानको केन्द्रीय बैंक स्टेट बैंक अफ पाकिस्तानमाथि ब्याजदर घटाउन चर्को दबाब रहेको ट्रिब्युनले उल्लेख गरेको छ । यद्यपि बैंकले ब्याजदर घटाउन अस्वीकार गर्दै आएको छ ।

उच्च ब्याजदर हुँदा निजी क्षेत्रमा ऋण प्रवाह कमजोर हुन पुगेको जनाइएको छ । हाल पाकिस्तानमा ठूलो ऋणको बोझ छ । सरकारले आफ्नो बजेटको आधा हिस्सा अर्थात् ८.२ ट्रिलियन पाकिस्तानी रुपैयाँ ऋण भुक्तानीमा खर्च गरिरहेको छ ।